الحلقة الثامنة عشر

يوم الخميس الظهر كان بوخليفه مسوي عزيمه لاهل البيت عشان ام سعود ياييه زياره لاهلها..والكل كان متيمعين يعني بيت بو خليفه كانوا كلهم في البيت العود..الا عبدالله طبعا وحرمته وزعل بو خليفه يوم درا انهم ما بيون بس ام خليفه اقنعته ان عبدالله لاهي عن دوامه من اسبوع وما جابل الشركه ولا شاف الشغل..بس بو خليفه بعد حرج ان اليوم جمعه ماشي دوام ..وام خليفه تحاول فيه لين ما رضى ..والظهر عقب ما تغدوا وخلصوا كل شي..في الصاله نشت ساره وبناتها عفرا وحمده وسارن البيت يدرسن لامتحان باجر اللي بيكون لحمده اخر يوم وعفرا بعدها بيوم وتخلص..

شمسه: ما دقيتوا لسلامي ولهت عليها...

بو خليفه: امس روحت بيت ريلها قبل تيين بشوي..

خليفه: وانا اقول جني شايف سيارة حامد امس عند الدوار...

بو خلفيه:هيه والله ياي امس وخذ حرمته..

شمسه: خساره ما لحقت عليها..

ام خليفه: واعلي عليها بنتي مادري بلاها خاف الا متواجعه ويا ريلها..ويهها مب على بعضه..

بوخليفه:لا ما عليها شر ان شاء الله الا خرابيط اليهال..

خليفه: وين يهال يا بويه الله يهديك عيزنا وبعدك على يهال..

ام خليفه: والله لو ان عمرك 100 سنه بتم اشوفك ياهل واحاتيك وفوادي ياكلني عليك وجنه عمرك خمس سنين..

حصه: بلاج امي متخبله على رقم 100  تبين سمر تييب 100 في الشهاده وعمر خليفه 100 شو السر..؟

بو خليفه:خلي امج في حالها لا تغثينها..

خليفه: من قدج محامي ودفاع شامل..هذي ام خليفه محد يروم لها..

حصه:الحين انا يا بويه مغثه الله يسامحك..

سمر:اسمع ونه الله يسامحك..يلعب ابويه وياج شقالوا لج ياهل هو..

حصه مبطله عيونها: من وين طلعتي انتي من قالج ترمسين اصلا..مب قلنالج يوم نرمس تسكتين ..صوتج وذا..

سمر: عاد اللي يسمعج انتي ماشاء الله تقولين عندليب..

حصه: فديتني شو يي العندليب عند صوتي..

سمر:يزيغ ويطيح ريشه..

شمسه تضحك: والله ولهت على حشرتكن...ما تيوزين يا حصيص نقول تكبرين وتعقلين ثرج الا تكبرين ويخف عقلج..

حصه:شوفيني زينة بنات العايله عقل وجمال وادب..واخلاق..

خليفه: بس للاسف لسان طوله شبرين...

سمر: هيه والله وبتتخرطف فيه بعد من طوله..

حصه: جب الله يخليج والله احس بلوعه غريبه يوم ترمسين مول ما اتحملج...

سمر:يعني انا اللي ميته عليج..

بو خليفه: بسكن ما تعرفن تحشمن حد انتن؟

ام خليفه:هذي حصه ما تيوز عن اختها ولا سمر هاديه ما ترمس..

حصه منصدمه...وسمر تطلع لسانها ومن يصد ابوها تتأدب وترمش بعيونها ونها مؤدبه ما سوت شي..

خليفه يتمصخر: والله كلهن يبالهن بالعصى في ظهورهن...

بو خليفه:ماعاش اللي يمد ايده على بناتي...

ورد يتذكر سلمى بنته بس حمد ربه انه محد يعرف عن الموضوع ولا بس بيقولون بو خليفه الا رمسه بدون فعل...

حصه: الله يخليك لنا يا بويه ذخر وعسانا ما نخلى منك..

سمر: وبهالمناسبه السعيده ان ابويه دافع عنا بقولكم شي..

حصه: انا بروح ارقد بنخمد..ما ريد اسمع نكت..

سمر: ما بقول نكته..ابويه عندي فكره..

بو خليفه: شعندج..؟

خليفه: ارمسي يا ثقلج تييبين المرض..من وين طالعه انتي..

سمر: من بطن امي..

خليفه متقرف: والله انج تييبين المرض..

حصه: الحمدلله حد أيدني..

سمر: ابويه شوفهم..

بو خليفه متأفف من ثقالة سمر:ارمسي وخلصينا..

سمر ماده بوزها:ابويه شو رايك نسير نخيم في حتا.؟

خليفه: وانا اتحرا بتقول شي..

ام خليفه: هيه والله صدقها..

بو خليفه: وين صدقها يا ام خليفه..بنخيس من الحر ما تعرفين نحن في الصيف الحين..

ام خليفه: يمكن شي نود ولا هبوب بارد يينا..

خليفه مبتسم: وين يينا الله يهديج يمه يعني بيعرف ان نحن سايرين نخيم وبيهب علينا..

حصه وهي تطلع فوق: لو قررتوا تسيرون مكان خبروني انا ما بسير وياكم بتم في البيت ولا بسير بيت عبادي...

بو خليفه: لين متى بتمين يا شمسه هني.؟

شمسه: باجر موعد طيارتي الساعه 12 بالليل..

ام خليفه: ما طولتي ..!!

شمسه: عيالي وريلي وامتحاناتهم بس ييت اشوفج  واطمن عليج واشوف سالفتكم ويا مسود الويه..

خليفه: خلاص ان شاء الله كل شي بينحل خلوا ثقتكم فيني كبيره...

وتغيرت اشكالهم عقب ما يابوا طاري ذياب..وعقب اذن العصر وكلهم نشوا يصلون وخليفه ركب موتره بيسير بيت عمه بو حمد...

........................

في صالة البيت كانت ملانه ما تعرف شو تسوي رايحه راده للزراعه وما تدري وين تتوجه..فكرت تتصل في حصه بس تعرف انها ترقد هالوقت..فكرت تروح بيت راشد بس ما تبى تغث العيال وقالت احسن شي تسويه انها تسير ترتب حجرتها وتغير فيها شوي...وقبل تطلع فوق كان تلفون الصاله يدق..شلته وردت...

ليلى: مرحبا..

شيخه:امي حبيتي..

انفتضت ليلى وقلبها يدق بقوه: حبيبة قلبي انتي فديت هالحس الغاوي..

شيخه: امي تعالي..

ليلى مبتسمه: وين ايي فديتج..؟

شيخه: امي تعالي ثليني ماليد ماليد..

ليلى: زين حياتي باجر بتيين...اقول شواخي منو متصل لج..؟

شيخه: هذي مااعلف من اثمها..

ليلى: قولي خالوه فاطمه..

شيخه تضحك..

ليلى: ما يضحك قولي خالوه فاطمه..

شيخه: ماليد...

ليلى:زين شواخي متى بتردين..؟

شيخه:امي اليدث تعالي..يالله بنلوح بيتنا..

ليلى: فديت هالحس يا ربي...زين حياتي يالله بسير الحين ارتب حجرتي..روحي العبي..

شيخه:ذين..

وصكت شيخه عن ليلى اللي سارت حجرتها..ترتبها وتشوف لها كم شغله لين ما يأذن المغرب وعقبها بتسير تصلي..اول ما طلعت الحجره فوق تعايزت تسوي شي ولكنها نشت ترتب ثياب شيخه وتيمع اللي يبى له غسيل واللي يبا له ترتيب مع ثيابها..عقبها ملت ويلست على شبريتها..وتذكرت ربيعتها شما اللي كانت وياها ايام الدراسه...وابتسمت وقررت تتصل بها وتسلم عليها..تعرفهن المعرسات من البنات دوم حجتهن العرس في قطاعة ربعهن...بس انصدمت وتضيجت وايد يوم عطاها ان الرقم مب مستخدم حالياً..

نشت ليلى لطاولتها وخيبة امل فضيعه صايبتنها من ناصر اللي ما فارق خيالها لثانيه وحده...كل شي في حياتها كان يذكرها فيه..كل شي واي شي..ثيابها والالوان والضحكات والدموع..اوراقها والاقلام..حتى اشعارها وكل شي كان مرتبط بناصر..ناصر اللي كان عيونها الثنتين اللي تشوف بهن وقلبها اللي عايشه به..كان ناصر يعني لها الحياة الجديده...دومها تفكر انها بائسه وحياتها صعبه والوحده متعبتنها بس ياما عقدت الامال في ناصر وكانت تقول املي بالله كبير واكيد انه بيعوضها كل اللي فات...حطت راسها على الطاوله بيأس...

"كنت دوم اقول اني وحيده..ضعيفه ولو اني قويه..كنت طول عمري هشه بمشاعري قويه بكبريائي..ما سمحت لانسان يتقرب مني رغم كثرة اللي شفت...كل شي حواليه كان يحبني..وكنت ما احب شي الا هو..كأن الحب فيني انخلق عشانه...(تتنهد)..كنت اقول كلما مريت في ازمه.ما عليه يا ليلى لا تضيجين الايام اليايه بتكون احلى واروع كل شي بيكون حلو..ناصر بيغير علي الدنيا...بس للاسف..مافي اصعب على الانسان من ان الشي الوحيد اللي نعلق عليه امالنا يخيبها...الله يسامحك يا ناصر..على الاقل كان حسستني انك معيشني بزيف وحب كاذب ماله وجود..."

رفعت راسها وابتسمت ابتسامه أليمه يمكن حاولت فيها تضحك على نفسها..بس استجمعت اللي بقى فيها من قوه ويلست ترتب حجرتها وتشغل نفسها من التفكير اللي لا محاله ما تروم تشرد منه...
.
.
خلصت ام راشد صلاة المغرب ونزلت الصاله يوم سمعت حس خلود حرمة راشد عندها ويلست وياها...

ام راشد: وين راشد ما قام يي يسلم علي...من امس ما شفته؟

خلود: والله هلكان يا عمتي لو تشوفينه كيف..

ام راشد: واليهال وينهم ما شفتهم.؟

خلود: يدرسون حليلهم..

ام راشد: بتيين وياي بنسير صوب الزرع ما شفته اليوم الضحى كانت عندي حرمة سعيد بن محمد..

خلود:يالله عمتي بنسير...

ونشن بيسيرن الزرع وهن في الحوي سايرات برا شافن سلامه يايه من الفله وشكلها توها ناشه من الرقاد..بس طنشتهن وسارت بيت يدها على طول....وطلعت عند عمتها...اللي كانت ترتب الحجره بعدها..كانت سلامه صدق ضايجه وشكلها معتفس..واول ما دخلت عند عمتها يلست تسولف لها...

ليلى: والدراسه انتي ما تبين تخلصين ولا شو رايج..؟

سلامه: عموه باجر اجازه يعني بدرس لا تحاتين..

ليلى: مبين..الا اقول حمداني بيخلص الاحد وانتي.؟

سلامه: ما اعرف ..حمدان تعرفين متى بيخلص وانا لاء..انتي اصلا تحبينه اكثر عني..وانا اعرف في هالبيت ولا حد يدانيني حتى شيخه..ولا البشاكير...اذا امي وابوي ما حبوني برتجي حب من انا..؟

انصدمت ليلى...وتمت تطالعها ...سلامه ما تضايقت من سؤال ليلى اكيد..في شي مضيج بها وانفجرت هاللحظه...

ليلى: شو هالرمسه اليديده؟

سلامه وهي تنش: ماشي يديد خلاص تعودوا كل شي..تتحرون بس انتوا اللي تحسون..انتوا اللي تتعبون..وانتوا اللي تصير لكم مشاكل...يعني انا عشان مب معرسه وما عندي عيال لازم حياتي كلها فرح وما ييني الهم...ليش الهم بس هم العيال والريل؟ عمره حد فيكم ما قال لي ليش متضايجه يا سلامه..؟ ليش عيونج حمر..؟ ليش اليوم ما مريتي البيت العود..كل شي يمر بهدوء وسلام..سواء ييت ولا رحت..(دموعها بدت تطيح) انا ما اعرف شو اللي جابرني اصبر..وليش اتعذب والكل ينازعني ولا حد فكر فيكم شو سبب ضيجي..حتى انتي يا عمتي اللي دوم وياييه بالزينه والشينه..تغيرتي وما عاد همج الا نفسج وشيخه..انتي اصلا وايد متغيره ومن زمان...(تصيح اكثر)..ان شاء الله ربي ياخذني منكم وارتاح...

طلعت سلامه وخلت ليلى في داومه من الصدمه على الذهول على الخوف ..

"شو اللي بيخليها تفكر جي..؟ شو اللي ممكن يشغل قلب سلامي البرئ..؟؟(تعض على شفايفها بألم)..صدق انا مقصره وياهم...؟ معقوله انهم حسوا اني متغيره وما قمت اسأل عنهم؟ بس انا بعد لي مشاكلي وحياتي صح احبهم واداريهم بس مب شرط اكرس كل حياتي لهم..في لي جزء خاص من حياتي لازم اعيشه..شو فيها سلامي..؟ شو صار عليها..؟ معقوله متألمه هالكثر وهب طايعه ترمس؟انا لازم اكلمها"

.
.
في هالوقت سلامه وصلت حجرتها وانفجرت صياح..كل اللي تعرفه ان نفسيتها تعبانه وجداً تعبانه...راسها بينفجر من الصداع..وكل شي حواليها متعب...امها وينها عنها..الحين عمرها 16 سنه شوي وتدخل ال 17..عمرها ما فكرت تلوي عليها ولا تحبها ولا تنشدها شو سوت في امتحانها...الحوار بينهن وايد مقتضب...عمرها ما فكرت تقول لها "بنتي شو فيج؟" تتحرا هالشي مب مهم ما تدري ان أي انسان مهما كبر عمره وقل احتياجه للناس ووقف على ريوله..عمره ما بيستغني عن حنان امه..عمره ما يغنيه عنها شي..فما بالها بمراهقه في عمر سلامه...

تمت سلامه تصيح ما تدري ليش بس كل اللي تعرفه انها وحيده ومب قادره تحب حد رغم ان الكل في المدرسه يحبون شخصيتها القويه حتى رغم الدفا اللي في ملامح ويهها ورغم تقاسيمه شديدة الجمال والانوثه الا انه ما يكفيها..تبى حد يحس بها يحبها يحترمها..يقدسها كإنسانه...

وهي في غمرة ألمها نزلت تحت ويابت التلفون فوق...ودخلته لاول مره حجرتها....ودقت لعبدالرحمن..كم كثر محتاجه تشكي له بمكنون قلبها..مافي انسان في هالعالم يفهمها كثره في نظرها..كان الحب اللي تحبه لعبادي..اكثر من أي شعور ممكن يوصف وقلبها صدق مولع به..وحتى هو كان يحبها من خاطره يحب قوتها وعنفوانها..بس يقهره يدمره غرورها وثقتها بنفسها...دقت له وهي في اقسى لحظات ضعفها..

عبدالرحمن: مرحبا..

سلامه وصوتها ثجيل من الصياح: اهلين عبادي..

عبدالرحمن: شو بلاه حسك؟

سلامه حست: حد عندك؟

عبدالرحمن: هيه والله ويا الاهل عقب اشوفك ان شاء الله..تعرف ويكند ما نشوف بعضنا الا فيه..

سلامه بخيبه شديده: اوكي برايك..

عبدالرحمن: باي..

صكت سلامه عنه وقلبها يتفطر حزن اكثر..حتى الانسان الوحيد اللي وثقت فيه وحبته..ما كسرت خاطره وهي تصيح..مفروض لو يحبها في نظرها يضحي بالناس والاهل عسب يكون وياها في لحظاتها العصيبه...

تمت تصيح لين ما حست قلبها بينفجر من الصياح والضيج اللي فيها..وتمت على هالحال مصدومه من نفسها على حياتها..ولو انها انتبهت بوقت متأخر بس الظاهر ان لكل صبر حدود وشكلها وصلت للحد الاخير...

.......................

الساعه 7:30 كان حمد في موتره واقف جدام بيت سعيد بن ناصر...اتصل بخليفه قبل ينزل..

حمد: مرحبا خليفه.

خليفه:هاه وينك؟

حمد:خلاص وصلت الميلس ان شاء الله خير..اول ما اظهر بتصل بك..

خليفه:زين ما وصيك..

حمد:اوكي يالله برايك..

وبند حمد عن خليفه ونزل الميلس وظهر له منصور اخو محمد ربيع ذياب..ويلسوا ويا بعض وكان الميلس فاضي محد فيه الا هم الاثنين..

منصور:يا حياالله القاطعين ..

حمد: الله يحيك وين قاطعين عاد تعرف ناس ودوامات ما عندي وقت..

منصور: وين ما عندك وقت الله يهديك..حق سلوم فاضي بس نحن اخر من تنشد عنه..

حمد يضحك مجامله:حرام عليك سالم لروحه ما عنده ربع وانت الشباب ما شاء الله مازرين الميلس عندك..

منصور:انزين يالطيب ما قررت تعرس بتوصل الثلاثين وانت ما فكرت حتى بالعرس..على الاقل اخطب اضمن لك حرمه زينه..

حمد: والله ما فكرت بالعرس مول وجان على الخطوبه حق شو اخطب واعلق البنيه دام العرس مب في بالي ..يعني اقطع بختها وانا معلقنها جي..

منصور: يالله الله يوفقك ان شاء الله..

حمد: تعرف يا منصور انا ابغيك في سالفه وان شاء الله ما تردني فيها..

منصور: فالك طيب انت تامر امر..الله يقدرني عليها وان ما قدرت اخلي أي حد يسويها لك ولا تم بخاطرك..

حمد مبتسم:فالك ما يخيب يالطيب وهالعشم فيكم..

منصور: تفضل..

حمد:اسمع يا منصور اخوك محمد مسجون ويا ولد عمي ذياب وذياب ما يخصه بالموضوع وربعه يعرفون هالشي بس تعرف حركات الخساس في الشباب مب راضيين يعترفون ويلغون الموضوع ويفكونا...

منصور يطالعه ببرود: هممم زين..كمل.

حمد منقهر شوي:جنه الرمسه مب عايبتنك؟

منصور: لا افا عليك كمل بسمعك..

حمد:بصراحه يا منصور جان لي معزه عندك وما بتردني يا ليت تخلي اخوك يغير اقواله والله لو تشوف حال عمومتي والله يعورك قلبك..امه طايحه بالمستشفى ثلاث ايام مهدده بجلطه باي وقت..

منصور:الله يكون بعونهم بس ترا لنا ولد وياكم هب لرواحكم انتوا..

حمد:بس ذياب ما يخصه واخوك يعرف بهالشي...

منصور: اعرف...

حمد: عيل شو بتسوي الحين..

منصور ابتسم: فالك طيب يا حمد ان شاء الله اخليه وقت الجلسه الاولى يغير اقواله..

حمد ابتسم من قلبه:العشم فيك يا ولد الاياويد..ودامك مسهل علينا حبيت اقولك اننا خلينا راعي السياره يتنازل عن البلاغ وان شاء الله يتخفف الحكم النهائي...

منصور مستانس: الله يبشرك بالخير..عيل ابشر اهلي ..

حمد: على خير ان شاء الله..

منصور:نشوفك يوم السبت في الجلسه..

حمد: لاء انا مب ياي ان شاء الله اخوه العود خليفه بيكون وياه..

منصور: هيه اعرفه...

حمد ينش: عيل اترخص انا منك الحين..

منصور: ما يلست اتريا بنحط العشا..

حمد: دام فضلك بس والله وراي كم مشوار لازم اخلصهن...

منصور: الله يحفظك يالغالي..

ووصله لين الباب وعقب روح حمد ومنصور دخل البيت...

.
.

وفي الموتر اتصل على طول في فرح وحس انه وايد اتأخر عليها...وردت عليه من اول رنه..

حمد: اعرف شو بتقولين لا ترمسين والله توني طلعت من ميلس الرياييل ما بغى يفجني الريال...

فرح معصبه:احترقت وانا ادق عليك وليش ما ترد...صدق انحرق دمي...

حمد مبتسم: سمعي والله ان تلفوني في السياره والله...زين حبيبتي اسف والله..

فرح مبتسمه: اووه اووه حمودي يتأسف السالفه فيها شي...

حمد: حبيبتي بعد حرام اتأسف لها...

فرح: فديتك انا..

حمد:احم استحي انا لا تتفدين..

فرح: عيل والله فيك شي غادي مؤدب اونه عاد حمد يستحي..

حمد: زين يالله حبوبه انتي وين..

فرح: في الكوفي وانت وين؟

حمد معصب: شو تسوين هناك.؟ عسب الشباب يتفرجون عليج؟

فرح: شو بلاك أي شباب اللي ترمس عنهم والله ولا حد صد ولا طالع..يالسه في الزاويه من يشوفني..؟

حمد:هيه تراج يالسه تطالعينهم كلهم..

فرح: والله ما شفت ولا واحد شو فيك؟

حمد: عيل كيف عرفتي ان ولا واحد صد صوبج؟

فرح: انا لله وانا اله راجعون..قول انك ما تبا تيي وفك عمرك من الحشره..

حمد: بييج الحين ودج اني ما ايي وبيرج من شعرج جدام كل الخلق..

فرح مبتسمه: زين يالله اترياك..

حمد:اضحكي ما عليه بتشوفين الحين..

فرح:اشدراك اني اضحك...

حمد:ما عليه خلج مثل ما انتي...

ونزل حمد من موتره وسار الكوفي اللي في المارينا وفرح بعدها وياه على الخط...

فرح: وين انت الحين..

حمد: بعدني عند الدوار..

فرح: بس اسمع صوت حشره عندك..

حمد: عيالي في السياره غثوني...

تضحك عليه وشوي ويشوفها في الزاويه متغشيه وعرفها...وسار لها..واتفاجأت منه..

حمد: مسكتج متلبسه بتهمة المغازل..

فرح تمت يالسه وابتسمت...

حمد يلس مجابلنها: شحالج غناتي.؟

فرح : الله يسلمك شحالك انت..

حمد يضحك..

فرح مب طايره من الفرح الا اجتازت المجره من فرحتها ودها تنش وتباغم في البقعه وتقول احبه احبه احبه لين ما يسمعها كل الناس..

حمد:زين احلويتي عن اخر مره..

فرح استحت:مشكور..

حمد: العفو..شو تشربين.؟

فرح: أي شي من ايديك حلو..

حمد: ما بعصر لج شي شو قالولج اشتغل وياهم بالمطبخ ..ونه أي شي من ايديك حلو..قولي أي شي من ايدين الهندي حلو..

فرح ميته من الضحك عليه..وتموا يسولفون وتعشوا ويا بعض وعقب ما سهروا احلى سهره في بوظبي..ردت فرح البيت وهو رد شقته..

...................

في فلتهم بدبي...كانت بدريه يالسه تقنع عبدالله ساعه يسيرون بوظبي وهو مب طايع..وهي تحاول وهو رافض الفكره كليا وشالها من باله...

بدريه: ارجوك الله يخليك عبادي والله فضيحه ان ما سرنا..

عبدالله: اقولج مب ساير لا تحاولين اذا بييج حمد يشلج سيري وياه والله ما سرت هناك..

بدريه: ليش فديتك والله شموس بتاخذ في خاطرها منك والله عيب..

عبدالله: شو بوظبي انتي الثانيه بعد..اسبوع خست فيها وتبيني ارد عشان ابويه ما يفج مني ويقول لي انا بيلس وانت جابل الشغل..واودر شغلي هني..قلت لج مب ساير الجو ما يساعد..

بدريه: والله بسوي لك اللي تبى عبادي حبيبي ارجوك..

عبدالله : انسي الموضوع مستحيل نروح..تبين اتصلي بأخوج خل يوديج..

بدريه: هيه وبعدين يتمصخرن علي الحريم..ريلها ما يسوي لها شي ومودرنها في بوظبي وهو في دبي..تباني اخليك هني بروحك عشان تاخذ راحتك..

عبدالله: أي راحه واي خرابيط الله يهديج..مب ساير يا بدريه عورتيلي راسي بالحنه والله بينفجر..

بدريه: اوكي عندي اقتراح..

عبدالله: مب ساير بوظبي لو بكل الاقتراحات..

بدريه: اسمعني زين..

عبدالله: قولي بس بعد ما بنسير بوظبي..

بدريه: زين اسكت واسمع...

عبدالله: يالله..

بدريه: بنسير باجر .........

يقاطعها عبدالله: اقولج مب سايرين بلا حنه صدعتيلي راسي والله بينفجر منج..بدريه بس عاد..

بدريه: زين اسمع الفكره وعقب ارمس..يمكن تتوافق مع مشاريعك...

عبدالله: ماشي سيره لبوظبي ويكفي حنه على راسي منو معلمنج الحنه انتي منو؟ صدق اول مره تكونين جي...

بدريه:منك متعلمتنها...

عبدالله: صدق اليوم غاديه حنانه بشكل فضيع...

بدريه تضحك: زين حبيبي لا تغير السالفه بتسمعني ولا لاء...؟

عبدالله : ارمسي...

بدريه: بنسير باجر الصبح انا وانت وبنخلي البشكاره في البيت..وبنتغدا في بيت عمي والساعه 7 المغرب بنروح..وبنقول لهم بشكارتنا في البيت وعبدالله عنده اجتماع مهم باجر في الشركه وجي ما بيطلبون منا نيلس..

عبدالله: بعد ماريد..مب مقنع الحل...دوري لج على شي ما يخلي ابويه مول يقول لي ايلس في بوظبي...

بدريه: اوكي نسير لهم بوقت متأخر دليل اننا ما نروم نيي بوظبي ومايينا الا بالصعوبه يعني نسير لهم العصر ونقول بس بنتعشى وبنروح..وشمسه اكيد رحلتها بالليل انا دقيت لها اسلم وهي قالت لي رحلتها يوم الجمعه في الليل...يعني انتهت زيارتنا وبنرد البيت...

عبدالله:رحلتها في الليل؟

بدريه بفرح في قلبها:هيه..

عبدالله: اممم..

بدريه تتريا الموافقه: شو قلت.؟

عبدالله: اوكي اتفقنا بس والله ان لزق ابويه فيه والله لا اخليج في بوظبي وارد دبي...ويلسي انتي جابلي شغله..

بدريه تضحك: اوكي فديتك يا ربيه انا...والله احبك..

عبدالله ابتسم:عيل كل يوم بوديج بوظبي..

بدريه تضحك:عسب تسمعها مني..انت بس قول متى تباها وانا بقولها...

عبدالله: مالها طعم يوم اطلبها حلاتها جي منج بدون مقدمات...

ابتسمت بدريه ونشت تسوي لريلها العشا لين ما يشوف التلفزيون وعقبها بترتب ثيابها حق باجر..عسب يسيرون بوظبي...

......................

في الحجره اللي فوق كان يالس يرتب اوراق المشروع اليديد اللي على وشك الانتهاء..ويشوف في التقرير اخر الاعمال..وشوي ويدق باب حجرته...

فهد: تعال نصور..

ناصر يدخل ويصك الباب: شو تسوي؟

فهد يدخل الاوارق في الملف: اشوف اوراق ابوي خلصن ولا بعدهن...

ناصر: زين انزل بنظهر..

فهد وهو يطالع الملفات: وين؟

ناصر بضيج: أي مكان...

فهد حس بصوت اخوه وطالعه: شي يعورك؟

ناصر:لاء بتظهر وياي..

فهد حط الملف في الدرج وقفله:ناصر اخوي شي بلاك؟ مب على بعضك..

ناصر بضيج: فهد والله العظيم احبها...

فهد:يا بوك انسى...صار اللي صار..

ناصر بأسى: لو شفت شكلها يوم خبرتها والله لو انك حجر بتصيح من حالها...

فهد: ليكون صحت.؟

ناصر: تخسي الا انت...حرمه انا اصيح..

فهد: الدموع مب عيب العيب الطعن في الظهور..

ناصر سكت وغمض عيونه:فهد تتوقع ممكن يصير شي يلغي العرس..

فهد: لا يا بابا ماشي بيلغيه..شو تتوقع مثلا اروى تموت يوم العرس..ولا ابوي يحب قوم خالي ناصر..ماشي بيصير من هالاشياء....لازم شوي تتنازل عن خيالك اللي تعيش به خلك واقعي وانسى حركات الافلام انت مب في فلم مصري تلتعن طول الفلم وفي الاخير الظروف تسير لصالحك وتتزوج اللي تحب...اخوي حبيبي دخل احلامك في مخباك...وحط فبالك شي واحد..يوم سمحت لك نفسك تقتل حلم انولد في قلب انسانه من يوم انخلقت...انه بييك اليوم اللي تخسر فيه احلامك....

ناصر خاف من رمسة فهد: أي انت شو تقول؟

فهد: اللي سمعته..يا ناصر اعقل وفكر بحرمتك اليديده وبيتك وحياتك وعيالك اللي بيون باجر منها..وانسى وحده خلاص صارت ملك للزمن..

ناصر: انت تحلم وايد ان ليلى تصير لحد...ليلى عمرها ما كانت الا ملكي انا...ولو اموت محد بياخذها غيري..

فهد: ودر عنك حب التملك وفكر بعقلك شوي انت بتصك الثلاثين متى بيكبر هذا(ويأشر على راسه)..

ناصر بضيج: زين شو اسوي شو؟

فهد: تعرف بخبرك شي...

ناصر: شو؟

فهد: انا قلبي ما يعورني عليك مول..كان بإمكانك بشوية ضغط تثني ابوي عن رايه..وتخلي اروى الثانيه وتحافظ على ليلى...وقلبي بعد ما يعورني على بنت خالي ليلى..لانها قويه ومب في حاية شفقه منا...تعرف انا الوحيده اللي كاسره خاطري بالموضوع كله هي اروى بنت عمتي...

ناصر مبطل عيون على الاخر: ليش ان شاء الله..

فهد: لانها الوحيده اللي ضايعه في هالمعمعه...هي الوحيده اللي ما تدري بشي..كل اللي تعرفه ان بتاخذ حضرة جنابك..ولا تدري عن ماضي عشقك المستمر..ولا تدري انك مغصوب عليها...

ناصر تنهد...عمره ما فكر في اروى...ليش تنظلم شو ذنبها...؟ مسكينه هي اكيد فرحانه...وقلبها ميت من الوناسه..والارض مب واسعتنها...بس كيف بيكون شعورها يوم تدري انهم يزفونها لانسان وياها منه الجسد والروح ضايعه...

فهد: اروى ضحية ابويه وضحيتك انت...ضحية ابوي لانه يبغيها عشان يدخل شراكه ويا ابوها في مشروع المباني اليديد اللي صوب السمحه...وضحيتك انت يوم انك بتكون بقلبك لغيرها وبجسدك بس لها...بذمتك ما تكسر الخاطر هالبنت؟

ناصر يحس قلبه يحترق: محد قال لها توافق...

فهد ينش بيطلع: هه!!! هيه محد قال لها توافق...مسكينه اروى صدق مسكينه..الله يصبرها بس...

ناصر تم يالس على الشبريه ما رمس بس حس بقلبه يشل حمل ثاني غير همه وهم ليلى..صار له ثلاث هموم همه وهم ليلى وفوقهن هم اروى...صدق معقوله يظلمها ناصر...؟ معقوله انها بتنظلم وياه..؟ افكار تمت تدور في بال ناصر..اللي مب ناقص هم بس زاده فهد فوق همومه هموم زايده....خلت كل المواجع بقلبه تتقلب...

....................

الساعه 11:30 بالليل كان راد من  ميلس واحد من الربع...ونزل من السياره وسار بيت امه على طول وما مر بيتهم...وكان يعرف ان امه راقده بس اصر انه يمر بيتها اول وعقب يسير فلته...دخل الصاله وحس بهدوء فضيع وقاتل..بس مشى وشاف ليت حجرة امه مب مبند وسمع سوالف...ودق الباب...

ليلى: منو؟

راشد: بطلي انا راشد..

ونشت ليلى بسرعه وبطلت له الباب...

راشد: السلام عليكم..

ليلى وام راشد: وعليكم السلام...

راشد قرب من امه وهوى على راسها يحبها وليلى بعدها واقفه...

ام راشد: وينك يا راشد ولهت عليك فديتك ما شفتك من امس..

راشد: امايه فديت قلبج والله وايد مشغول ومن حظي أني شفتج قبل اسير البيت والله مول ما توقعت انج للحين سهرانه...

ام راشد: ما ياني رقاد وزقرت على اختك تسولف لي ...

وطالع ليلى اللي بعدها واقفه وابتسم  ومد ايده لها..وهي طالعته بغرابه..

راشد مبتسم ماد ايده: بلاج تعالي...

ليلى يته وقربت منه ومسك ايدها ويرها صوبه وهي يلست حذاله..وهو قربها منه لين ما انحط راسها على كتفه...وحبها على راسها...

ليلى انصدمت منه وام راشد وايد تأثرت..عمرها علاقة راشد وليلى ما كانت قويه لانها وايد تحترمه احترام انجلب لحواجز واشياء الغت من بينهم عاطفة الاخوه...اما ليلى اللي ما تنحسد على هالموقف وقف شعرها وحست بقشعريره فضيعه...وبدون ما تحس دمعت...

راشد: بلاج الغاليه ما يسوى عليج...

ليلى صاخه ما ردت...

ام راشد: فديتها بنتي كم كثر تشل بقلبها وما ترمس ...

مسحت ليلى دموعها ورفعت راسها وطالعت راشد بخجل فضيع...ما تتجرأ مول ترفع عينها فيه..وايد عصبي وهي حساسه رغم قوتها بس تحترمه بشكل فضيع...

راشد:امايه عندي لج خبر...

ام راشد: ارمس..

ليلى بتنش: يالله امايه تصبحين على خير...

راشد: وين وين يلسي نباج تسمعينه ويانا...خبر يهم الجميع..

ليلى يلست ...

ام راشد: ارمس يا ولدي شو ؟

راشد يضحك: شوي شوي علي...

ام راشد: مافيه صبر ارمس..

راشد: ليلى..

ليلى: يا عونك...

راشد: في واحد من معارفنا خطبج مني..ريال محترم وما عليه قاصر ما شاء الله مرتاح هو واهله..وولد عرب وناس..شو رايج تفكرين بالموضوع..؟

ام راشد وقلبها بيتقطع من النبض وايديها تتنافض وويها متقطع من الوناسه: لا تقول يا راشد.؟

راشد مبتسم من خاطره: صدق..

ليلى قلبها انتهت كل نبضات الحياه فيه...ما تسمع شي ولا تحس بشي غير كلمة"خطبج مني"...حتى تحس بفراغ وماشي يتردد على مسامعها غير هالكلمه...

ام راشد: منهو يا راشد؟

راشد: فلاح ولد علي بن بطي..

ام راشد تتذكر: هيه عرفتهم عرفتهم..هاييل من معارف ابوك الله يرحمه..امه بنت ناصر بن سهيل...كانوا حذالنا يوم كنا ببيت اهلي قبل ياخذني ابوك...

كان راشد يرمس وليلى في عالم ثاني ما تتصور شو اللي سمعته...

راشد: والحين عاد نبى نفرح...من يوم عرس مبارك ما فرحنا والحين ما شاء الله عنده اربعه...يالله نبغي نفرح في اخر العنقود...

ام راشد: هاه بنتي شو قلتي..

ليلى طالعت امها ببرود: امي ما ابغي اعرس...

راشد : ليش؟

ليلى: ما ابغي اعرس وخلاص كل انسان حر في حياته وانا مب للعرس..ابى اتم عند امايه..

ام راشد بحزن: بس انا ما بتم لج العمر كله يا بنتي..لازم تعرسين العرس ستر للمره..

ليلى وهي تحاول تتماسك: بس انا مابا اعرس..

راشد: مب كيفج بتعرسين والريال ما يعيبه شي...

ليلى بجديه: كل شي بخليك تسويه فيني على هواك دون ما اعارض الا العرس يا راشد..مستحيل تجبرني اعرس وانا ما ابغي..

راشد: عيل تترين شو؟ خلاص اللي بعمرج عندهن عيال ومعرسات من متى ....وانتي لين متى بتمين جي؟

ليلى:راشد كل انسان ونصيبه وانا ماريد اعرس...

ونشت تحب راس امها وطلعت وفي القلب مليون جرح وجرح كل ماله يزيد...

طالع راشد امه بضيج..وهي نزلت راسها بحزن...وحبها على راسها وطلع وهو ضايج الخاطر والصدر..كل امله كان في ناصر بس ناصر خذلهم...كان متأكد ان ناصر يبغي ليلى وما بيستغني عنها...وكان يترياه على احر من الجمر..بس ناصر باع الموده ونسى الحب الجديم...ويوم يات الفرصه لليلى رفضتها....وخاب امل راشد فيها..بس هو قرر ما يرد على الريال لين ما يرمس ليلى مره ثانيه...

اما ليلى في حجرتها حاولت ترقد بس ما قدرت...غيرت ثيابها وتوضت وصلت ركعتين ..انسدحت على الشبريه وغمضت...

"ما اتخيل عمري اكون حرمة حد غير ناصر...ما اتخيل اني ممكن اوهب قلبي لانسان غير ناصر..ولا بعرف احب حد كثر ما حبيت ناصر...فديتك يا ناصر بعمري كله وحياتي كلها..رغم اللي سويته ورغم الجرح اللي في قلبي منك..بس بعده والله القلب ما يبغي غيرك...ما تهون علي اعرس ولو انك ملك غيري..ما يهون علي اودر كل هالحب وافكر بغيرك...كيف طاوعك قلبك تفكر بغيري..وانا اللي ما جد سمحت لمخلوق يشغل بالي غيرك...ناصر كلمه تعلمتها من يوم بديت ارمس واليوم قلبي ينطقها...بس جتلت احساسها بإيديك...معقوله قلبي يغفر لك هالطعنه؟ معقوله؟ ما اتوقع...."

كانت ترمس عمرها ودموعها بغزاره غاسله ويهها...وقلبها يدق بقوه...تتمنى لو كانت شيخه هني علىالاقل بتصيح بحضنها وبترتاح لو انها طفله..بس وجودها يحسسها بالراحه....نشت ليلى وسارت صوب قلمها وورقتها...وسجلت عصارة المها في سطور..

"خذ راحتك صبري على بعدك كبير...لا تنزعج مني ابد دنياك عاشرها وسير...لا تتعب افكارك معاي وانا مجرد ذكريات...راحت مع احلام السنين هذا المقدر والمصير...خذ راحتك عيش الهنا عيش الوفا مع من تريد..عسى الليالي تسعدك وتهنى مع الجو الجديد...وغلاك عندي ما حسدك ما دامك انته المستفيد..لكن ما خبي عليك ما عود لك مهما يصير اسلوبي وطبعي معاك من ما عرفتك ما خفا...اعاند القلب العنيد واوفي مع اللي هو وفا...اصفي مع القلب الصدوق لو في غيابي ما صفا..مبداي في الدنيا يقول الله على الظالم كبير...لي ما عرف معنى الهوى ولا ذاق تلويع الغرام...يا صاحبي صعب عليه يكمل غرامه بالكلام..في الحب تعذيب وسهر ترحال واسلوب وهيام...ما حس به غير الذي يشعر بتأنيب الضمير..خلك قوي العاطفه صادق مع نفسك وضوح...ارحل مع جو الامل مالك في تعذيب الجروح..الله معك الله معك...من وين ما تمشي وتروح...لك قلتها خذ راحتك...دنياك عاشرها وسير.."

عقب ما خلصت عقت الورقه على المكتب وسارت ترقد...ان ياها رقاد قبل تفكر في كل شي يصير حواليها ابتداء من قلبها مرورا بسلامه وحمدان وشيخه وانتهاء بنفسها وحياتها وكل شي يمر عليها...
..................

الضحى عقب ما نشت هي وبو خليفه طلعوا يتريقون في الصاله...لان الجو كان وايد حار برا...وهم طالعين من حجرتهم كانت شمسه في الصاله تتكلم تلفون...

بو خليفه:صبحج الله بالخير يا ام سعود...

ابتسمت شمسه وعطت التلفون ابوها وحبته على راسه...وهي سارت لامها تيلس وياها...وابوها تم يرمس ريلها...

ام خليفه:هذا سالم اللي على التلفون؟

شمسه: هيه..

ام خليفه: شحاله وشحال العيال..

شمسه:كلهم بخير بس بدر مأذنهم ما يطيع يدرس...

ام خليفه: شعليه المبزاي لازم ما يدرس ما يبغي غير امه...

شمسه :فديته والله بغيت ارمسه قال ابوه انهم ساروا المدرسه...

ام خليفه: وش مدرسته هذي يوم اليمعه...

شمسه: لازم بعد مب عرب يمشونا على نظامهم...

وياهن بو خليفه ويلس وياهن...ويابن البشاكير الريوق..ويلسوا يتريقون...ونزلت لهم سمر...

سمر: صباح الخير..

بو خليفه: وعليكم السلام..

سمر استحت: السلام عليكم..

عقبها ضحكوا عليها وردوا السلام...

ام خليفه: لا تصبحين على حد بهالطاري ما شي ابرك من السلام..

سمر: زين...

شمسه: قربي تريقي ويانا..

بو خليفه: تعالي بنتي اتريقي...

سمر: ماريد الحين عقب بتريق...مب وقته..

بو خليفه: عيل له وقت خاص عندج..

سمر:هيه ابويه عقب اتريق مب الحين تعرف لازم بعد احافظ على رشاقتي..

شمسه تضحك..

ام خليفه: انتي روحج عود يابس شتبغين به الرجيم..ترا مب زين ..

سمر: ليش مب زين بالعكس يحافظ على جسمي يكون حلو ومب مترهل...

شمسه مصدومه: شو مترهل انتي بعد..؟ حشا ما خليتن شي بنات اليوم..انا بعمرج ما عرف شي غير شغل البيت..واسم امي وابوي..

بو خليفه: الله يخلي التلفزيون...

سمر: والله الرجيم شي يعرفونه الكل ما يحتاي ثقافه..

ام خليفه: مب زين مب زين..لانه من الشيطان الرجيم...

سمر وشمسه يضحكن...

بو خليفه: زين قربي اتريقي ولا تكثرين عسب ما تغدين متينه..

شمسه تغمز لها ان عيب تنش وتسمع الرمسه...وعقبها نشت سمر غسلت ايديها وقربت تتريق ويا اهلها....

...................

الظهر عقب ما رد راشد من الصلاه كانوا مقررين يتغدون في بيت ام راشد ويتهم خلود وعيالها سلامه وحمدان...وتيمعوا كلهم في صالة بيت بو راشد ونزلت وياهم ليلى ويلسوا يسولفون لين ما يي وقت الغدا..

ام راشد: الحمدلله اليهال قربوا يخلصون بنفتك من ويع الراس ومن المدارس وحشرتها...

سلامه: اخير بنعيش بحريه وسلام ونرتاح من المذاكره والواجبات..

حمدان: جتلتي عمرج بالدراسه...

راشد:ان شاء الله بس النتايج تبيض الويه...

خلود مبتسمه: ان شاء الله..

ليلى تغايض سلامه: حمداني فديته اكيد نتيجه غير متوقعه وشي مبهر..

حمدان اتشقق..

سلامه طالعت عمتها بنظره حاده:ان شاء الله اليميع..

ام راشد: يالله يا ولدي ما شاء الله كبرت وصرت طول ابوك...الله يوفقك يا حمدان..

سلامه تطالع حمدان بقهر وهو مبتسم..

ليلى: ما قلت لي حمدان وين عقب الثانويه ناوي تسير..

راشد على طول:الشركه عندي..

حمدان: بسير عند ابويه اساعده واشوف الحلال..

ابتسمت ام راشد وهي تتذكر راشد يوم كان بعمر حمدان ونفس الرمسه يقولها يوم كانوا صغار قبل يتوفى بو راشد.وليلى تشوف ولد اخوها بفخر وتتنهد من قلبها..كم كثر اشتاقت لشيخه وشطانتها وحشرتها وكم يسوى البيت وهي فيه..وكم يضيج عليها الكون يوم تغيب..بس ما عليه هانت شوي وتوصل شيخه باقي كم ساعه وتكون موجوده...

خلود: بسير اشوف الغدا مخلص ولا لاء...

وطلعت خلود...

راشد: ليلى..

ليلى انتبهت: يا عونك..

راشد: عانج الله..فكرتي في موضوع البارحه مره ثانيه...

ام راشد كل نظراتها توسل عسب توافق ليلى بس مافي امل والظاهر ليلى معنده اكثر واكثر...

ليلى:راشد فكرت بس ما ابغي..

راشد: ليلى فكري شوي بعقل...الموضوع وايد حساس وانت تعرفين موقفج...وافقي..

ليلى: امي محتايتني مب وقت هالسوالف..

ام راشد: لا تتعذرين فيه انا مب الحي الدايم..يالله يالله بحسن الخاتمه..

سلامه وحمدان يطالعون بعض مب فاهمين شي..

ليلى: امايه ما ابغي وخلاص...

راشد استلسم رغم انه ما فكر يضغط على ليلى اكثر ولا هو يقدر يجبرها تاخذه شاءت ام ابت..بس هو فكر بمنطقيه شوي وما حب يحدد مستقبلها ومصيرها في الحياه..وسكت عنها بيشوف شو بتسوي وقرر في نفسه يرد على قوم فلاح بن ناصر ويخبرهم ان البنت ما وافقت....

....................

الساعه 4:30 العصر كانت واقفه في الصاله لابسه عباتها وتنادي على امها وهي مستعيله..وامها بعدها في الحجره...ويتها البشكاره...

فرزانا:شو يريد ؟

اروى:ما زقرتج انتي ابا امي..

وتنادي على امها...وتطلع ام اروى من الحجره لابسه عباتها وجاهزه...

ام اروى: حشرتي الدنيا وجلبتي البيت فوق تحت بحسج...وين تبين؟

اروى: امايه فديتج تأخرنا وين بنلحق نحصل شي...

ام اروى: فديتج والله هالكثر مستانسه..

ابتسمت اروى بخجل وبراءه: امايه يالله فديتج..

وطلعت ام اروى ويا اروى وركبن الموتر سايرات يتشرن ويجهزن اعمارهن حق العرس...كانت اروى مب واسعنها الكون كله ولا واسع فرحتها...قلبها يتنافض من النبض...وفي السياره..

ام اروى: وين بنسير الحين...؟

اروى: بسير الشعيبي بشوف شو التشكيله اللي عنده واذا ما عيبنا شي بنفصل..

ام اروى: وعقبها..

اروى تفكر: امم اقول احسن شي نمر عقبها على محلات الفساتين الجاهزه...

ام اروى: فساتين شو؟

اروى: العرس..

ام اروى: زين بتشترين جاهز؟

اروى: مافي وقت افصل فستان عرس..وبعدين سالفة اني اصمم واسوي انا مب قد هالسوالف...

ام اروى: وشو اللي قاصر عليج..ما بتدفعين شي من فلوسج كله من بيت ريلج...

اروى: بعد ما يكفي الوقت اني افصل والمصممين الحين كل حد مشغول بنفسه..وزحمه ولو ادري من قبل ان شي بيستوي كنت حجزت لي في الصيف عند أي حد..

ام اروى: برايج اللي تشوفينه يا بنتي...

اروى: امايه هم حددوا الملجه؟

ام اروى: سمعت ابوج يرمس خالج بو ناصر وقاله انهم يبون الملجه قبل العرس بأسبوع ...

اروى شهقت: ليش جي؟

ام اروى: وليش تبينهم يبطون؟

اروى: امايه ماشي وقت ليش ما رمسوا من قبل بصراحه انا ابى اعرس في اجازة الربيع ماريد الحين...

ام اروى: بكيفج هو؟ عاد جان الشور عليج ما بتعرسون قبل سنه...سمعي ابوج وخالج حددوا العرس وبيكون شهر تسعه...

اروى ابتسمت بعفويه: اووه زين بعده بعيد باقي شهرين ونص..

ام اروى: زين وصلنا انزلي يالله بنشوف شو تبين من السوق والاسبوع الياي بنسير دبي ونتم يومين بيت خالتج وضحى تتشرين اغراضج بعد من هناك...

اروى وهي تعق غشوتها على ويهها: انزين..احسن بعد..دبي اكشخ..بس ماداني بيت خالتي وضحى..

ام اروى: وليش ان شاء الله؟

اروى: اكره عيالها كله يطالعون فيني..مب شايفين خير..

ام اروى: منو يطالع فيج؟

اروى: ضاحي وعيسى...

ام اروى خزتها بنظره: من زينج الحين..انتي بس تتحرين يطالعون ولا عيال اختي حشام عن طبوع الخياس ومطالع البنات...

اروى: اييه انتي مسكينه ما تعرفينهم عدل..

ام اروى بنظره متردده: وانتي شو اللي فيج يتشاهد كلج على بعضج ما يدلج الزين ...

اروى شهقت: فديتج يا امايه ما ادري انا اشبه منو مب جنه الخلق تقول اني نسخه منج..وبعدين واثقه من عمري جمالي الفتان يأسر الالباب..ولا مب ولد خالي عايف العرس ثلاثين سنه عمره وما خطب من البنات غيري..هذا دليل اني ممكن اغير اراء الناس..

ام اروى: انتي ما تدلين الحيا وبنات اليوم فصخنه حد ترمس جي..يالله انزلي جدامي اشوف..

اروى مبتسمه وتضحك :فديتج والله عذاب يوم تحرجين...

ونزلت هي وامها وسارن محلات الذهب يشوفن  وياخذن اللي يبن..

..................

الساعه 5:15 العصر كانت بدريه وعبدالله سايرين بوظبي وفي الدرب يسولفون....

عبدالله: انا بسلم وبشرد...

بدريه مبتسمه: وين؟

عبدالله: بشرد أي بقعه بس ان شافني ابوي رحت فيها..ترا ماداني يوم يقبضني شغله..

بدريه: حرام عليك ..

عبدالله: فديت هالويه..

ضحكت بدريه: ليش تغير الموضوع..

عبدالله:من زمان ما يلست وياج وما سولفنا ولا عشنا حياتنا ولهت على دبي..

بدريه مبطله عيونها: ما صار لنا ربع ساعه من يوم ظهرنا منها...

عبدالله يغمز لها: بس غير هناك ذكرياتنا واشياءاتنا وحياتنا..كل خصوصياتنا...هناك بيتي انا وانتي وبس..

بدريه مبتسمه: بعد عمري يالرومانسي انته...

عبدالله: متعلم منج..وبعدين تعالي...شو سالفتج ويا عفاري بنت اخوي..

بدريه: شو سالفتنا...؟؟

عبدالله: تلفونات ومساسر وقعده لين الفير في بيت ابوي..خبريني انا ريلج..

بدريه: احلف انت؟ سوالف بنات شعليك..

عبدالله: انتي حرمه وهي بنت..يعني ماشي توافق ..يعني عادي تستوي السالفه بين حرمه وبنت وريال..

بدريه تضحك بتمصخر: هاهاها..

عبدالله: لا والله صدق شو سالفتها..

بدريه: ماشي بس تحب تسولف عندي وتخبرني عن نفسها..

عبدالله: احيدها ما تداني حد مول...شو مسويه فيها..؟

بدريه: ولاشي والله انت ما تعرفها عفاري وايد رقيقه...بس تحتاج حد يفهمها..

عبدالله: وانتي ماشاء الله الطبيب النفسي..

بدريه تضحك..

عبدالله:احط لج شي تسمعينه...

بدريه: لاء انا بحط لك اغنيه حلوه..اهداء مني لك...

عبدالله: لاء لاء..اول شي انا وعقب انتي..

بدريه ابتسمت: زين يالبيبي..حطها وانا بسمع...يا رب تكون حلوه...

وحط عبدالله الشريط على طول وكان عبادي الجوهر..وشهقت بدريه يوم سمعتها..وابتسمت له وهي تتفدا امه وابوه واهله كلهم...عبادي حبيب الروح والقلب اللي محد يسواه...

 

"هو فيه مثلك!!!...ياللي الحسن ظلك هو فيه مثلك!!! ليــــــه العطر وانتي انفاسك دخون...؟ لين الكحل وانتي ما غيرك عيون...وليه تفكير يكون انك تكوني دايم اجمل..انتي اجمل..انتي اجمل من جمالك انتي اجمل من دلالك من خيالك...ياللي كل افراح قلبي والحزن في المسافه بين فرقاك ووصالك...وليه يالقلب الحنون تاخذك فيني الظنون...؟...ضعيتي عدلك هو فيه مثلك..انتي ما غيرك عيون...وانا احبك احبك احبك..وانتي انفاسك دخون...وانتي انفاسك دخون.."

بند عبدالله المسجل وطالعها وهو يغني: وانا احبك احبك احبك...وانتي انفاسك دخون..

ابتسمت بدريه ورغم طول الفتره اللي من بينهم بس ما قدرت تتحكم في ملامح ويهها وابتسمت بخجل فضيع...وحمره شديده تعتلي خدودها..

عبدالله: عذاب لون خدودج..

بدريه: والله انك ما تستحي بس عاد..والله ويهي احترق...

عبدالله: حبيبتي انتي...

بدريه: زين انا بحط لك اغنيه..

عبدالله: اوكي اتريا بس ان ما عيبتني بعق عمري من الدريشه..

بدريه وهي تدور الشريط: بسم الله على عمرك..ان شاء الله انا ولا انت..

عبدالله: فديت عمرج لا انا ولا انتي..بعدين اذا صار بج شي لا سمح الله..انا بتخليني لمنو؟

بدريه: فديتك والله ما بخليك لحد لان عمري ما بخليك...

عبدالله: لا بصراحه وين بعيش وانا اسمع كل هالحب..لازم هذي يبا لها دعمه...

بدريه: تعوذ بالله من ابليس شو دعمه انت الثاني بعد...

عبدالله: ما حصلتي اللي تبين...

بدريه: اشوف شو عندك وعقبها بختار وبحط لك اغنيه حلوه...

عبدالله: وانا اتريا...

بدريه: الله لقيت شي حلو...اسمع بحطه لك بس مب اغنيه هي قصيده بس وايد روعه...

عبدالله: يالله حطيه..والله انتي تحفه تهديني اغاني من سيارتي..

بدريه وهي تشوف الشريط مغبر : يعني اوقف اقرب تسجيلات واشتري لك شريط بس عسب اهديك اغنيه في الدرب؟

وحطت الشريط...

"اخر قصيده قلتها فيك..اذكر قبل عامين وياك..نسيت؟ ..نسيت يوم اكتب على ايديك يا بعد عمري لا عدمناك...واليوم تطلبني وانا اعطيك اخر قصيده تكسب رضاك...عنوانها ربي يخليك..ارحم وداد اللي تمناك..بس انشدك قلي انا افديك..شاللي من الدنيا تبلاك..تنسى..وانا دايم اراعيك تهجر وتبعدني بذكراك...وين السلام وين السلام ومدة ايديك عوّد ولا تنوي ع فرقاك..صدق مشاعر قلب يطريك..يا مالك عقلي بطرواك..لو بعتني بالروح بشريك..تكفي ابتسامه من محياك وتبغي الصراحه ميت فيك..الطف ترحم بي انا فداك..."

خلصت القصيده وبدريه مبتسم...وعبدالله اسرع بالسياره اونه مستانس..وشهقت بدريه من الخوف ما تداني هالحركات بس عبدالله تهور وتم يشوح بالسياره وهي حاطه ايدينها على ويهها من الخوف...

بدريه: عبدالله بس دخيلك بس...

عبدالله مستانس: لا تراج خبلتي بي شو هالقصيده الغاويه ما روم ايود عمري الحين...

بدريه: عبدالله الله يخليك بس خبال مانبغي نموت الحين..

بس عبدالله تهور اكثر واسرع على الشارع اكثر بشكل جنوني وتم يستهبل بالسياره وبحركات غبيه...طايشه..وبدريه تصارخ وهو مستانس..

بدريه بتصيح: عبدالله بس والله قلبي بيوقف من الزيغه..

عبدالله ميت من الضحك: احسن خلنا نستانس شوي...

بدريه: ورفجة بو خليفه تهدي..

هدى عبدالله ومشى عادي على الطريج وهو مستانس...

عبدالله: زغتي..؟

بدريه: تعرف انك سخيف...

عبدالله: قولي والله..

بدريه: شو هالحركات تعرف اني ازيغ والله روحي بغت تطلع من الخوف..

عبدالله: قل لن يصيبنا الا ما كتب الله لنا..اذا الله يبغيج تموتين جي بتموتين جي...فديت عمرج يعل يومي قبل يومج..

بدريه: بس بعد قال ولا ترموا بأنفسكم الى التهلكه...حركات مراهقين...!!!

عبدالله: زين يالكبيره انتي...قربنا نوصل افف والله ماريد اسير...الله يسامحج.

بدريه بعدها محرجه: لا ترمس وياي صدق زعلانه...

عبدالله: زين حبيبتي والله اسف..

بدريه: زين سامحتك...مب جنه هذي شعبية بيت عمي..

عبدالله: هيه الحين وصلنا جهزي عمرج...ان شاء الله ابوي يكون في المزرعه مب في البيت..

تضحك بدريه: ودك عشان تاخذ راحتك..لا يا حبيبي عمي متوله على بنته يبا ييلس عندها...

ودخل عبدالله السياره البيت ونزلت بدريه هي وياه وساروا الصاله على طول....

......................

المغرب وعقب ما رد من المسيد دخل البيت وشاف امه يالسه في الحوي وتطالع شيخه تلعب في الماي اللي في الزرع...

احمد: البنت جاهزه...؟

ام احمد: هيه يا ولدي خلاص ودها بيت اهلها...

فاطمه: بتوله عليها...

احمد: شيخه تعالي...

شيخه: وين بنلوح..؟

احمد: عند امج..

ام احمد: بسم الله على البنيه...

احمد: ترا عمتها غاديه امها شو نسوي..

شيخه نطت بسرعه عند احمد وبفرح: بنلوح عند امي..

احمد يشلها: هيه يالله..

وحبتها فاطمه وام احمد وركبت وياه وهم في الدرب..مستانس احمد ويتمنى لو تطلع البنت الي شافها ذاك الاسبوع على الاقل نظره بس...

احمد: شيخه شو اسم امج...

شيخه: ليلى...

احمد: منو تحبين في البيت..؟

شيخه تفتح اصابعها بتعدهم: امي وددوه وامداني وبث...

احمد: ماشاء الله عندكم وحده اسمها بث...؟

شيخه:بث..

احمد: زين ومنو اللي مب حلو في بيتكم..

شيخه: لاثد...وثلامه..يع..

احمد غمض عيونه: منو هالهندي اللي عندكم اسمه لاثد..؟ ليكون بس عمج راشد..

شيخه: ايوه لاثد..ماحبه وحث..

احمد: ومنو بعد؟

شيخه: ثلامه.

احمد مبتسم: سلامه...اخت حمدان..

شيخه ابتسمت ما تعرف شو ترد عليه...وعقبها وصلوا البيت وكانت ام راشد يالسه في الحوي فما دخل السياره داخل..ووقف برا وظهرت له البشكاره ونزلتها..وهو روح عنهم خايب الرجا...

شيخه من وصلت البيت بدت فيه الحشره..والاستهبال والضحك وسارت على طول عند يدتها اللي لوت عليها ويلست تحببها لين ما وصلت ليلى اللي بغت تقطعها وهي استانست وبدت تعطي امها التقرير المفصل عن كل شي صار في الثلاث الايام اللي طافن في بيت خوالها...
.................

في بيت بو خليفه الساعه9:30 الليل يالسين الجميع في الصاله من ام خليفه وشمسه وعبدالله وخليفه وبدريه وعفرا وحمده وساره وحصه وسمر وبو خليفه..

ومستانسين يسولفون وخليفه ما رمس في موضوع ذياب مخلنه مفاجأه حق باجر ..وبعد ما يبى يفتشل لو ما يستوي شي واخرتها بس يعلقهم بأحبال ذايبه....

حمده: يالله متى تطلع شمس باجر ونفتك من المدرسه...

عبدالله: هاه اخت حمدووه بتأجزين وبتبدا الصدعه الله يعينك يا خليفه...

خليفه: ادري بها بتبدا تحن بتسافر وبتسافر...

عفرا: هيه والله ابويه نبغي نسافر..مليت من البيت ابى اطلع شوي ويا ليت نسافر ويا قوم عمي عبدالله ...

كلهم تموا مبهتين منو يرمس وبكل طلاقه وبدون حواجز...

ساره مبتسمه: خلاص عقب النتايج بنسافر..

بو خليفه: ما ابغي اسافر انا..

ام خليفه: ولا انا بعد..

حصه: يعني انا تعرفوني ما حب اترزز ويا حد اذا امي وابوي ما راحوا شو ذنبي ايلس في البيت..

بدريه: بتروحين ويانا منو قالج بتيلسين في البيت..

حصه: ماحب سوالف المذله اذا ما سار ابويه وامي انا ما بروح...

شمسه: منو بيذلج انتي ويا اخوانج..

حصه: انتي ما تعرفين شو يسوون خصوصا العود..

ابتسم خليفه: تقصديني انا...

سمر: هيه نسيت كيف حرجت علينا ذاك اليوم يوم نبغي نسير كارفور..

خليفه: بل عليكن ما تنسن ثاركن...

سمر: كيف ننسى ضيعت علي مشوار مهم...

يضحكون على سمر..وعبدالله يطالع بدريه انه يكفي بيروحون....وبدريه تأشر له ان يصبر شوي..بس هو نش ولا سمعها باجر عنده دوام ومب متفيج لليلسه في بوظبي..

عبدالله: زين يا جماعة الخير نحن نترخص..

بو خليفه: وين عبدالله ما بتيلس هالاسبوع في البيت؟

عبدالله انصدم وفي خاطره"مب بس الويكند ماشاء الله يبى الاسبوع كامل": لا ابويه عندي اجتماع مهم باجر ويا الموظفين...

بو خليفه: لازم يعني؟

عبدالله: ابويه ما روم ايلس في بوظبي...

عفرا: عمي دخيلك تموا هني والله بموت ان سرتوا الحين..

بدريه: بسم الله على عمرج حبيبتي..

ساره: ما طولتوا حرام بدريه يلسي..

عبدالله يطالع بدريه بنظره ان هاللي كان خايف منه ...

بدريه: خلاص بنسير عمتي ورانا شغل والله...

وفعلا نشت بدريه ولبست عباتها وطلعت وسلمت على شمسه وعمومتها والحريم وركبت السياره...

وعبدالله وقف يسلم على شمسه: يالله تحملي على عمرج وسلمي على سالم واليهال...وحبي لي بدر...

شمسه: افا عليك يا عبادي تروح وانا بسافر الليله...

عبدالله مفتشل: اسمحيلي شموس والله وراي شغل لا له اول ولا تالي وانا حالف ما طب بوظبي قبل شهر بس عشان خاطرج والله...

شمسه: فديت روحك يالغالي...

وسلمت عليه وركب موتره وشاف بدريه شوي زعلانه..

عبدالله: نحن متفقين من دبي صح؟

بدريه: زين انا ما قلت شي..

عبدالله: وليش زعلانه الحين؟

بدريه: فضيحه نطلع ورحلتها عقب اربع ساعات خلنا نتم شوي وعقبها نسير...

عبدالله: ماريد اتم تبغين تسيرين سيري...

بدريه: شو هالرمسه..

عبدالله: حبيبتي سمعي...هم يبغونج تمين..انزلي عندهم وانا برد دبي وبتصل في حمد باجر الصبح او العصر يردج دبي زين..

بدريه: من خاطرك ولا بس عشان ترضيني..؟

عبدالله مبتسم: والله من خاطري...

بدريه مبتسمه: يعني اسير لهم الحين وانت بتدق لحمد يوصلني باجر دبي..

عبدالله: اكيد حبيبتي..

بدريه: فديت روحك انا...

وبطلت الباب بتنزل..

عبدالله: تحملي على عمرج ولا ترقدين بروحج رقدي ويا حصوه فوق..

بدريه : ان شاء الله حبيبي تلحف عدل والله الله في السواقه لا تسرع فديتك..وانا بدق لك كل شوي..

عبدالله: مع السلامه فديتج...

وردت بدريه داخل وكلهم تفاجأوا منها بس فرحوا عقب ويلسوا كلهم سهرانين مع شمسه لين الساعه 11:00 وعقبها خذها خليفه وروحها المطار..وبدريه تمت سهرانه ويا البنات حصه وحمده وعفرا..اللي ودرن المذاكره مب مصدقات ان بدريه عندهن...وفي حجرة حصه..

حصه:زين نحط فلم..؟

حمده: حطي أي شي هاي فرصه ما تتعوض عمتي هاديه والوضع غير قابل للتغيير...

عفرا تضحك:عاد عمتي عيد لين ما تبتسم...يالله حطي أي فلم...بس رومانسي ماحب العنف..

حصه: عدال يالنعومه انتي...

عفرا: فديتني ما تحمل المشاهد العنيفه...

بدريه:اييه انتي وهي يالله كل وحده تسير حجرتها سيرن بيتكن ونهن يبن يشوفن افلام...انسه عفرا وانسه حمده ماشي وراكن دوامات باجر..؟

عفرا:عمتي خلصت والله ما يبا له علينا باجر تربيه اسلاميه..مخلصه الحفظ من متى...

حمده: وانا اصلا مخلصه دراسه من ايام التقويم الاول وحافظه المنهج عن غيب في اوراق صغيره..

انفجروا ضحك على حمده اللي عيني عينك تغش...

بدريه تبند التلفزيون: ماشي سهر يالله البيت بييكن الاسبوع الياي وبتم كل الويكند اللعب يتعوض والنجاح ماشي يعوضه...

عفرا انسدحت على شبرية حصه: انا ما اريد اروح..

حمده: عمتي الله يخليج بس عاد فلم واحد...

بدريه: وليش ان شاء الله ناويه تشوفين كم فلم..

حمده: نسهر للصبح...

حصه: الحين نحط ولا لاء..؟

بدريه: لاء حمده وعفرا بليز ردن البيت...

فرت حمده المخده في ويه عفرا...تتحرا انه عادي...بس عفرا تغيرت ملامحها والكل اتريا انها تعصب على حمده...بس فجأه شلتها وفرتها في ويه حصه...اللي انصدمت....

حمده: الحمدلله عدت على خير...

حصه: وليش ما تفرين اللي فرتج يعني مستقويه علي..

بدريه بتموت من الضحك عليهن وانجلبت الحجره استهبال..ونشت سمر اللي كانت راقده...

سمر بثقاله وتفرك عيونها: شو هالحشره ابى ارقد...

حصه تفرها بالمخده: جب طلعي برا نحن اكثر عنج مب طالعين عسب وحده..

سمر: والله بخبر ابويه عليكن...

بدريه: يالله طلعن يا بنات الحين المغثه نشت مافينا على حشرة عمي...

ونشت عفرا وحمده وكانت الساعه 2:30 الليل..ووصلتهن بدريه وحصه لين فلتهم..وردن وتمت حصه وبدريه سهرانات شوي..وعقبها رقدن على طول...

..................

الصبح الساعه 7:30 مرت حصه على ليلى البيت وسارن الدوام وفي الدرب...

حصه: خلج عاديه البسيه لا تبينين شي...

ليلى:من قالج بسوي له سالفه اصلا مب انا اللي اتوصى يا عمري..

حصه مستانسه: ان شاء الله يموت من قهره..

ليلى: اييه انتي شو يموت من قهره شو تخربطين انتي...

حصه: بعدج تدافعين عنه...؟

ليلى: معصبه عليه هيه اتمنى له الموت لاء..تراه في الاخير ولد عمتي..

حصه: زين سوري..

ليلى: يالله ننزل....

ونزلن الدوام...وكانوا كل الموظفين موجودين وسارن مكتبهن على طول...يلسن يشتغلن وليلى تفكر لو شافته شو بتسوي...

"معقوله لو شفته اضعف ولا اكرهه..؟ شو من موقف بعيش فيه لو يت عيني في عينه..؟ يا ربيه..اذا رمسني شو اقوله..؟ارد عليه ويعرف اني محترقه ولا البسه ويبين اني مب مهتمه..بس والله ما يصدقني لو اسوي عمري مب مهتمه...ولو كابرت بعد هو يدري انه جرحني...بس بعد انا لازم اسوي عمري عاديه في كل الاحوال...مستحيل اعطيه فرصه انه يشفق علي او اني اكسر خاطره..بخليه يندم بس بطريقه راقيه شوي..حلوه هذي حتى الندم فيه طرق راقيه...ما علينا والله بسوي فيه العجب عسب يعرف ان الاحاسيس مب لعبه ولا المشاعر سلعه تنباع وتنشرى بأرخص الاثمان.."

حصه: هييه..

ليلى: شو؟

حصه: التلفون يدق ردي عليه...

ليلى انتبهت وشلت السماعه: الو مرحبا..

حمد: مرحبتين ليلى شحالج..؟

ليلى تطالع حصه: هلا حمد بخير الحمدلله شحالك انت..

حصه طالعت ليلى مبتسمه وغمزت لها...

ليلى: الحين؟

حمد: هيه اذا ما عندج مانع...؟

ليلى: افا عليك الحين بييك..

وبندت من عنده..ونشت..

حصه: وين؟

ليلى مبتسمه: بسير عند حمود..

حصه: ليلوه وين سايره..وبعدين حمد شو حمود..طباخكم هو؟

ليلى: ما نسمي طبابيخنا حمود..

حصه: شو يبغي هذا..ما يعرف يضرب على تحويلة مكتبي شو من ادمي هذا..ليتني انا اللي رديت..

ليلى وهي بتطلع: سواء رديتي ولا مارديتي كان بيطلبني انتي ما تعرفين لهالشغلات...

حصه: اسمع انتوا..

ليلى ردت وبطلت شنطتها وطلعت منها ورقه وعطتها حصه: حصووه شوفي..كتبته اول امس..

حصه: الله من زمان ماقريت اشعارج...يا ربيه شو مبدعه هالمره اكيد شي فلته...

ليلى: يالله برد وابى اسمع رايج بس هاه بدون مديح ما حبه تراني...

حصه : زين زين سيري...

طلعت ليلى سايره فوق لحمد...وتمنت بليار مره في الدرب انها ما تشوف ناصر...متلوعه منه ومالها بارض تشوف ويهه...واول ما وصلت فوق دقت باب مكتب حمد وقالت للمره المليون الحمدلله ان باب مكتبه مبند وما شافها وهي خاطفه حذاله....

حمد: تعالي ليلى...

ليلى دخلت: السلام عليكم...

ناصر وحمد: وعليكم السلام...

تيمع الدم كله في ويه ليلى وحست عمرها تحترق وكل شي حواليها مب طبيعي...يعني طول هالوقت شارده منه تيي وتلاقيه هني في المكتب عند حمد...

ناصر اول ما شافها ابتسم من خاطره..."فديتها والله تحريتها بتغيب عقب الصدمه..والله هذي ليلى اللي احبها قويه عمر الازمات كلها ما تهزها...فديتج يا ليلى والله محد يسواج.."

ناصر: شحالج ليلى...

ليلى وهي تيلس بدون ما تطالع فيه: الحمدلله شحالك انت؟

ناصر: بخير الله يسلمج..

ليلى وهي تطالع حمد ومسويه اكبر طاف لناصر: حمد ممكن اشوف الاوراق اللي قلت لي عنها.؟

حمد: تفضلي..

شافتها ليلى ويلست تقرا فيها وحمد يلس يقرا في الملف اللي بين ايديه...وناصر يطالعها ما شل عينه...

ليلى: هالاوراق مخلصينها من متى ..ملف منو هاللي مب مخلص؟

حمد: تصدقين ما ادري حتىالاسم مب مكتوب وفي شي ما لاحظتي؟

ليلى: امبلى في ارقام مب موجوده يعني في اشياء وايد مسحوبه من الخزينه..

ناصر: وعسب جي نحن يايين نناقش الملف هذا لمنو...في حد يتلاعب بالميزانيه...

ليلى ما ردت عليه ورمست حمد: راجعت كل الملفات..

حمد: لاء..

ليلى: عيل راجعهن كلهن وشوف اللي اسمه مب موجود وشيك على باقي الملفات...

حمد: بس اغلبهم ردينا لهم ملفاتهم..وما اذكر منو ولا منو...وبعضهم في اجازات وانتي تدرين بهالشي..

ناصر: اوكي حمد يعني يبالها شغل كبير..

حمد: ابى حد يساعدني...برمس دانيال...

ليلى: حمد مب مشكله انا بساعدك...

ناصر انقهر من رمست ليلى وما عيبه انها ترمس حمد جي وتاخذ وتعطي وياه واللي قهره اكثر انها لابستنه وما ترد عليه مول...

نش ناصر ضايج: حمد عقب بكمل وياك خلص ويا ليلى الشغل ومر علي خبرني شو مستوي بسير اراجع بعض الملفات اللي عندي واطرشهن البنك...

حمد: خلاص خير ان شاء الله...

ويرن تلفون حمد ويستأذن من ليلى يرمس وهي تمت تشوف الملف..

حمد: متى؟..اها اوكي خلاص ساعه وبكون عندج...رمستي عبدالله..؟ اوكي خلاص جهزي نفسج وبييج...لا لا ما عندي شي باخذ اذن وساعه وبوصلج دبي..مب مشكله...اوكي بدريه...؟

انصدمت ليلى منو بدريه وكيف جي يرمس وحده جدامها...شكلها ناسيه انها اخته...بس انقهرت من وقاحته...وخلصت اللي باقي معاه وسارت المكتب على طول....

ليلى تصك الباب: حصه حصه..

حصه: شو؟ قالج انه يحبني؟

ليلى: متفيجه والله..سمعي سمعته يرمس بنيه..

حصه معصبه: قولي والله..

ليلى: يعني شو بتسوين مثلاً؟

حصه: شو قالها.؟

ليلى: قالها بوصلج دبي ساعه وانا عندج..واسمها بدريه بعد..

ضحكت حصه: غبيه هاي بدور حرمة عبادي...

احمرت خدود ليلى يوم اتذكرت: اووه كيف ما يا على بالي والله اني غبيه...

حصه:خرعتيني والله..

ليلى: اللي يسمع ما تدرين عن مغامراته العاطفيه دون جوان...

حصه: والله القصيده عذاب عذاب عذاب...

ليلى: فديتج والله..زين صدق قولي لي قويه..؟

حصه: بس ما يستحقها خساره فيه بيت على بعضه..

ليلى: يالله الا هي فضفضه...

حصه: انزين شو صار وياكم..شفتي ناصر...

وخبرت ليلى حصه بكل شي وعقبها ردن يكملن شغلهن..

........................

الساعه 10:00 بالضبط كان منصور بن سعيد بن ناصر...ويا خليفه بن مبارك واقفين في المحكمه بعدما صدر الحكم النهائي وبعدما غير المتهمين اقوالهم وبحضور وائل صاحب القضيه...وتنازله عن كل شي جدام القاضي والشهود...وصدر القرار الاخير...ببراءة ذياب بن مبارك وتخفيف فترة السجن على باقي الشباب من سنه وثمان شهور الى شهرين لكل واحد فيهم...بعدما غيروا اقوالهم واعترفوا ببراءة ذياب وانهم ما كان وياهم...وسلم خليفه وائل الباقي من المستحقات...وشكر منصور على حسن تعاونهم وشل ذياب وياه البيت....وطبعا في الدرب...

خليفه: لازم تشكر ولد عمك ترا لولاه ما طلعت ...

ذياب: ان شاء الله...

خليفه: ماشي صياعه ولا سهر ولا كمبيوتر ولا انترنت...

ذياب: ان شاء الله..

خليفه: قعده برا البيت عقب الساعه 10:00 ماشي...

ذياب: انزين...

خليفه وهو يدخل السياره البيت: انزل يا مسود الويه...

ذياب: منو يدري اني بيي..؟

خليفه: انجب وانزل وانت ساكت..

وسار وياه ودخلوا الصاله..وكانت ام خليفه وبو خليفه يالسين يشربون شاهي الصبح ووياهم بدريه بعباتها تتريا حمد ياخذها دبي...

يوم شافت ام خليفه ذياب شهقت...وطاح كوب الشاي من ايدها..وبو خليفه نش من مكانه...

وذياب في موقف لا يحسد عليه...سار لابوه وحب راسه ولوى عليه..ودمعن عيون بو خليفه من الفرحه ولين ما وصل حضن امه كانت مفرغه بحيره من الدموع...وهي تلوي عليه..

ام خليفه لاويه عليه وتصيح: فديت روحك يالغالي فديت عمرك..علني ما خلى منك يا بعد عمري فديت حسك ارمس ارمس فديتك ابى اسمعك والله ولهت عليك يا ذياب...

ذياب وهو يمش دموعه: امايه سامحيني والله اسف...

ام خليفه: فديتك والله مسامح دنيا واخره فديت روحك...

بو خليفه يمش دموعه في غترته ويلوي على خليفه: ريال ريال ينشد بك الظهر يا ولدي...

وخليفه مبتسم بفخر: خلاص طلعناه لكم ارتحتوا قلت لكم خلوا كل شي علي ما صدقتوني...يالله اترخص بسير دوامي من يوم سالفته وانا مودرنه..

كانت بدريه تصيح من الفرحه مب مصدقه اللي تشوفه...وبو خليفه متقطع من الوناسه..وزقرت ام خليفه على البشكاره تجهز له الحمام يسبح...وترتب حجرته وتنظفها عسب يرتاح...ويلست تحن على راسه شو يسوي ما يسوي وشو يأكلونه وكيف يرقد وكل ما خبرها شي تصيح زياده...وتموا يسولفون لين ما دق تلفون بدريه...

بدريه: اهلين حمد..

حمد: طلعي انا برا...

بدريه نشت واستأذنت من عمتها وعمها وسلمت عليهم وتحمدت لذياب بالسلامه وطلعت ويا حمد...

.
.
في السياره اول ما ركبت...

بدريه: شحالك حمودي...

حمد: بخير شحالج الغاليه..

بدريه: بخير ادري بتحرج اني ما خبرتك اني في بوظبي والله.....

حمد يقاطعها: ادري خبرني عبدالله كل شي....

بدريه: زين سوري بتعبك لين دبي..

حمد: خل عنج شغل المصاخه هذا...

وتموا يسولفون...ودق تلفون بدريه...

بدريه: هذي حصه..

حمد: لا تردين عليها..

بدريه: ليش؟

حمد: بس جي خلها برايها شو تبى هذي..اكيد بتقولج حمد وياج..

بدريه: زين خلني اقولها...

حمد: اقولج لا تردين برايها...

بدريه: زين خبرني عنك شو مسوي وشو اخبارك..؟

حمد: والله الحمد لله ماشي...كساد في سوق البنات..

بدريه: لحوول انت ما بتبطل...اقولك حمد ليش ما تخطب حصه...عيب عليك بتصك الثلاثين انت وهي وانت ما تجدمت وهي ترفض..

حمد: تروم هي توافق وانا عايش...

بدريه: زين اخطبها...

حمد يسرع شوي: ماريد..

بدريه: خفف السرعه تراني ازيغ يكفيني اللي سوا فيني عبادي امس..

حمد: شو سوا بج؟

بدريه: تم يشوح بالسياره بغينا ننجلب..والله فوادي بغى يطلع من صدري من الزيغه..

حمد يضحك بخبث: يا جبانه...

ويسرع اكثر...

بدريه: حمد والله اتصل بعمي وارد البيت..

حمد يخفف السرعه: زين خفت..

وردت حصه تتصل..

بدريه: برد عليها...

حمد: اقولج خلها تولي شو تبين بها..لا تردين..

بس ردت بدريه..

بدريه: هلا حصه...

حصه: اهلين بدريه شحالج.؟

بدريه: بخير سرت عنكم انا في الدرب بسير دبي...

حصه: ادري ووياج حمودي..

تضحك بدريه: اقول..؟

حصه: لا دخيلج اسكتي...

حمد:بدريه صكي التلفون...

حصه: شو يقول..

بدريه مفتشله: لا ماشي..

وتعض على شفايفها ان حمد يسكت وتترجاه بنظراتها...بس هو تم مأذنها يباها تبند...

بدريه: حمد شو فيك؟

ويسحب عنها التلفون وهي قابضتنه..

بدريه: يا حمد انتبه جدامك ما نبغي نموت...

حصه: ليش شو يسوي؟

بدريه: ولاشي يستهبل...

حمد: براويج منو يستهبل...

واسرع حمد على اخر شي وتم يشوح بالسياره ويخوف بدريه وير السماعه عنها وهي ميته من الخوف..بس ما قدرت تصك من عند حصه مفتشله لانها بتحس ان حمد ما يبغيها ترمسها...

حمد: بتصكين ولا بشل على تايرين...؟

بدريه تأشر له انه بيشوف...

حمد يضحك ويدوس اسرع ويلف يمين ويسار ويستهبل...

بدريه تصرخ: حمد بس عاد والله بتصل بعمي...

حصه: برايج جان مشغوله..؟

بدريه مفتشله: لا عادي برمسج...

وير السماعه منها حمد ويتضارب وياها وصدق حرج عليها ليش ماتصك ...وبقوه وهو منتبه لبدريه يدعم في طرف الشارع وتنجلب السياره جلبتين...بس دعمه عنيفه...تصارخ بدريه بصوت عالي وينقطع التلفون عن حصه...وترد تتجلب السياره...كانت جلبتها عنيفه ... انطلقت فيها كل الصرخات..وكل الالم..وكل الدموع..وينابيع الدم..وصور تتكرر كل يوم وكل لحظه في كل شارع من شوارع البلاد...ودخلت السياره في حدايد الشارع ودخل في الرمله على ينب ..وبين الحدايد وعجلات السرعه..وفي داومة الموت..وفي اله صنعها البشر لتقضي عليهم بكل سهوله..صرخت بدريه بطول صوتها وتبعها صوت حمد..وانين خافت..وفجأه انخمد الصوت..

تيمعوا الناس وانمزر المكان بالسيايير.. في الطريج للي سايرين دبي....الناس نزلت تحاول تشوف اذا حد بقى عايش ولا لاء...بس للاسف محد عنده جرأه يقرب منهم..الناس تخاف..ومحد فيه قوه ياخذ أي حد فيهم للمستشفى...كل الحوارات كانت.."السياره فيها حرمه وريال بس".."ساعدوهم حرام ذابوا بين الحديد..".."بسرعه حد يتصل بالاسعاف...النزيف فضيع عليهم"..."في حرمه بينهم تحركت شوي ووشكلها عايشه بعد..لحقوا عليها"....

ومن يغير الاقدار ومن يقدر يجاري سرعة الله ويغير ما كتب في صحف البشر..... وبعد فتره طويله حوالي النص ساعه وصلت سيارة الاسعاف والشرطه...وعلى طول خذوهم مستشفى خليفه....

وفي المستشفى...خذوا حمد غرفه قريبه على طول وودوا بدريه على طول غرفة العمليات...كانت جراحها خطيره ونزيفها فضيع...وفي الحجره اللي فيها حمد..كانت الممرضه تخيط شق في راسه وممرضه ثانيه تلف الجروح اللي في ايديه بضمادات...

حمد من على السرير يتحرك: خلوني وين اختي وينها..؟

الممرضه: هدي حالك اخي هدي حالك ان شاء الله بتكون بخير...

ونش عنهن حمد: مب فايج لكن وين اختي..

كان قلبه يدق بقوه..بقوه خايفه ما يبى يحط في باله ان بدريه ممكن تموت...مستحيل يتخيلها تموت...وسار بسرعه صوب العنايه وتم واقف يمشي يمين ويسار يتريا الرحمه من الله...لين ما طلعت ممرضه تركض بسرعه في الممر...ومسكها من ايدها...

حمد: ارجوج قولي لي شو صار؟

الممرضه: ان شاء الله خير اخوي بعدها عايشه تطمن...

خلاص ارتاح حمد وطاحن دموعه بغزاره على ويهه..هذي بدريه مب أي حد...كل شي يهون عشان خاطرها بس لا تموت...

" يا رب ارجوك لا تاخذها وجان تبى واحد منا خذني انا ولا تاخذها ارجوك يا ربي"

وطلع الدكتور اخير من الغرفه...

حمد: دكتور ارجوك طمني..

الدكتور مستعيل: لا تعطلني من شغلي عقب ما اخلص كل شي بنرمسك..اصبر شوي..الاخت في العنايه وعملية وقف النزيف للحين ما خلصت في حديده في صدرها صوب القلب انت ايلس ادعي الله يسهل عليها...

انصدم حمد كيف كلام الممرضه يناقض كلام الدكتور...

.
.
حصه استغربت كيف قطع الخط وتحرت تلفون بدريه فضى..وردت تتصل بس لقته مغلق وحست بشي غريب وخبرت ليلى اللي قالت لها ينزلن تحت يخلون الشركه تتصل بحمد...ويوم دقوا له قالها الموظف انهم مسوين حادث وهم الحين في خليفه...

بغت حصه تموت من الصياح ميته من الخوف واتصلن بالدريول وياهن وروحت هي وليلى على طول المستشفى....

.
.
طبعا رد الدكتور ويا جيش من الممرضات والدكاتره داخل الغرفه..وحمد اصبوعه يرتجفن من الخوف...وهو واقف صوب الغرفه شاف ليلى وحصه يايات وما رد عليهن وطالع حصه بإحتقار...خافت من نظرته وبنفس الوقت استغربت منها...

وشوي ويطلع الدكتور....

حمد بخوف: دكتور شو تسوون هالكثر خبرني شو صار عليها داخل..

الدكتور: انت عبدالله..؟

حمد خايف: لا انا حمد شو السالفه؟

الدكتور: كانت بتحكي طول وقت العمليه عبدالله عبدالله..فكرته انته..

حمد: لا هذا ريلها انا اخوها..يا دكتور مب وقته قلي شو مستوي؟

الدكتور: اختك عطتك عمرها...

حصه بصوت مرتجف: لا..ارجوك لاء..كل شي ولا الموت لاء...دكتور احلف..ارجوك احلف انها ماتت...مستحيل.....ليش ما كنت انا...ابى اموت الحين...

ليلى صاحت على طول وحمد تم واقف مكانه ما تحرك...دموعه على طول طاحن وشاف الممرضات يطلعنها وينقلنها غرفه جريبه وهو مشى وراهن على طول...

تصيح من قلبها..محترقه ميته من الخوف وكفوفها ترتجف..ووحده من الممرضات ماسكتنها تهديهاوطلعت تلفونها وهي ترتجف بس ما قدرت تدق....من كثر ما اصبوعها متلخبطات من الخوف...وبكل عفويه وخوف مسكت الممرضه منها التلفون..

الممرضه: شو اسمه اللي بدك تتصلي فيه...

حصه وهي تصيح من قلبها: مكتوب في التلفون " الوالد"..

واتصلت الممرضه..وعطته لحصه..

حصه منهاره صياح: ابويه وينك..تعال..

بو خليفه: هاه بنتي شو فيج  شصار عليج...؟ انتي وين بسم الله الرحمن الرحيم..

حصه تصيح بصوت عالي: ابويه انا في مستشفى خليفه صار على بدريه وحمد حادث...

بند بو خليفه بدون ما يرد عليها...وهي ترتجف وعظامها ميته من الخوف..ودموعها مب قادره تتوقف...قلبها يدق بسرعه وتنفسها صعب...

ووصل خليفه وابوه..ولوى على حصه وبعده ما يدري بالمصيبه الاعظم...

بو خليفه لاوي على حصه: يا بنتي عسى خير ان شاء الله وين ولد عمج واخته...

خليفه وهو واقف حذال حصه اللي منهاره وميته من الخوف بس ما رمست...

بو خليفه: وين اختكن بدريه..؟

انفجرت ليلى صياح يوم طرا بو خليفه بدريه...وخليفه تم يطالعهن بخوف...

حصه كانت تطالع ابوها بنظره كلها تعب الم ندم..خوف وحزن...وهو يطالعها يتريا منها اجابه بس الظاهر قوتها خانتها...

خليفه: وين حرمة اخوج ارمسي؟

حصه وهي مب متمالكه نفسها:ابويه الدكتور يقول انها ماتت...

بو خليفه مصدوم: بسم الله من رمستج لا ان شاء الله ما عليها شر..

خليفه فواده انقبض: بتصل بعبدالله خويه...

بو خليفه بضيج: لا تشغل اخوك على حرمته خلنا نتأكد اول يمكن اختك من الزيغه تهاذي...

كان بو خليفه مب مستوعب رمسة حصه ويدري انها من الخوف بتقول أي شي...وسار للدكتور اللي أكد له موت بدريه...وانفجع بو خليفه بموت بنت اخوه وحرمة ولده...وانترسن عيونه دموع..غير يوم ريال يصيح ..اكيد ان المصيبه مضاعفه في حجمها....ونزل راسه يمسح دموعه بغترته ...يمسحها بعد ما خانته...ويترحم على بنت اخوه وحرمة ولده...ويفكر بقلب ولده اللي بيحترق بعدما يدري باللي صار..

وقف خليفه واتسند بظهره على اليدار....خايف ما يعرف كيف بيخبر عبدالله...

كانت حصه واقفه ميته من الرعب وتحس كل شي بسببها...لو انها ما دقت لبدريه الصبح...؟؟وكان الشيطان يلعب براسها...وحاطه ايدها على حلجها عشان ما يطلع صوت صياحها..ودموعها ينزلن بدون توقف....

" لو اني ما دقيت لها لو..؟ لو اني صبرت لين ما توصلين شو كان بيصير؟؟ بأي ويه بقابلك يا خوي..؟ وين بروح من ذنبج يا بدريه وين..؟ اه يا حرقة فوادي على اللي صار.؟ ليتني اللي مت ولا انتي ..على الاقل انتي الكل يباج وانا ما مني فايده غير المشاكل وويع الراس..؟"
.
.

في الحجره الثانيه كان حمد مبهت يطالع اخته اللي مغطينها بشرشف ابيض...وانترسن عيونه دموع...حمد الجبار اللي ما يهز فواده شي..صاح من قلبه وتم يتلفت يمين ويسار..يدور شي يكذب في عينه الخبر..

شاف كل شي حواليه يقول ماتت...بدريه ماتت للابد.....وقبل يرفع الشرشف يت في عيونه مليون صوره..

ضحكاتها وابتسامتها وقلبها الطيب..وحضنها الدافي..ونظرتها الحنونه...واتصالاتها اليوميه...وين بدريه اختفت وافراح حمد بتختفي وياها...ولعب الشيطان براسه..وظهر للممر...وسار لحصه..اللي كانت تطالع بتعب والم..تنتظر منه الكلمه الطيبه والمواساه....

بس وين..؟؟

حمد كان في قلبه نار ونار كبيره بعد...قلبه محترق ويشوف في عيون حصه جريمه..وجريمه كبيره بعد....يودها من كتفها...

حمد والدموع تارسه عيونه: يا حقيره انتي السبب انتي اللي قتلتي اختي...بدريه ماتت وانتي السبب..انتي السبب...اكرهج انا من كل قلبي..

انفجرت حصه صياح..وما ردت عليه بكلمه..كانت تعبانه وفوق التعب تعبانه...تحس انفاسها تنتهي وعمرها ينقضي وكل لحظه حلوه متأكده انها مستحيل تعيشها بعد اليوم...

حمد: اكرهج يا حصه ومستحيل اسامحج على اللي صار طول عمري وبتم كارهنج العمر كله...وين بتشردين من حساب الله..؟؟ وين...؟ ضيعتي حياتي وحرمتيني من اغلى انسانه في الدنيا...

ليلى: اييه انت شو تقول هي ما يخصها شو جتلت اختك ما تخاف ربك انت....هي وين واختك وين...

حمد بحقد: يا ليتج كنتي بدالها يا حصه مافي حد بيتحسف عليج..

ليلى: اسمع اي انت حصه مب هي اللي كانت تسوق ولا هي اللي كانت ويا بدريه لو حد سبب موتها فهو انت لانك مب منتبه وانت تسوق .. بس اللي صار قضاء وقدر لا نقدر نلومك ولا من حقك تلومها....

ورد داخل يصيح مثل الياهل في الحجره وحط راسه على ويهها وهي متلحفه وتم يصيحها...اااه لو الصياح يرد غالي..جان تم حمد يصيح اخته بدريه العمر كله...تم يصيح ويصيح...ورفع عنها الشرشف وشاف ويهها ما فيه ولا جرح غير يبهتها...فيها خدش بسيط..بس كان راسها من ورا منترس دم..والجرح شكله عميق..وشاف رقبتها كلها جروح...وصدرها عليه شاش المستشفى وكل دم...بس ويهها كان مثل ما هو ..مسحة الحنان ما فارقته والطيبه كلها فيه..حتى وهي مب وياهم ..حتى وهي روحها عند ربها..كان لوجودها رهبه...كان حمد يشوفها ويرتجف..واخر شي شهق من قلبه..

حمد بصوت عالي: ليش انا بالذاات ليش.؟ ليش يا ربي ليش.؟؟ اشمعنى اختي من بد بنات الناس خذيتها..؟؟

رد يصيح من خاطره...

حمد: ادري اني غلطت في حياتي وسويت اللي محد سواه وعصيتك يا رب وكنت اسوي كل اللي نهيتني عنه...بس ليش ما عذبتني انا..ليش حرقت فوادي وخذيت اختي ليش...(وشهق شهقه كن روحه بتطلع وياها)..بدريه فديت حسج فديت مواطيج نشي..بوديج أي مكان في الدنيا ..ما قلت لج يا بدريه لا بندي التلفون ليش ما بندتي ليش؟؟ كان لازم تحرقين قلبي وتروحين..؟ كان لازم اعيش وحيد عمري كله..يالله يا ربي سألتك لو مالك حايه بنفسي خذها لك ماباها...

ورد يصيح..وقلبه محترق..

شل خليفه اخته البيت...بعد ما خلصوا التحقيق ويا الشرطه...وبو خليفه تم في المستشفى عشان يتابع الخطوات اليايه للدفن...

وهناك بعيد في الحجره..يالس على الارض وماسك راسه بإيديه ويصيحها من كل قلبه..
" بدريه وين تبين؟؟؟ لا تروحين علني افدا روحج...يا اختي وين بتخليني وانتي تعرفيني مابا شي من هالدنيا الا انتي...يا رب خذني بدالها..وردها يا رب ارجوك اسمع دعوتي..رجيتك لا تردني.."

كان حمد يصيح اخته صياح ما صاحه على ابوه يوم توفى...بدريه اخته وسنده والعون...بدريه اللي تضحي بنفس روحها عشان اخوها وكل الناس..

بدريه الطيبه راحت.....زاد صياح حمد وتم يشهق بقوه وحس روحه تنزع من التعب..مستحيل ترجع بدريه...وحس بإيد تنحط على كتفه..

بو خليفه: نش يا ولدي بارك الله فيك..انت ريال والرياييل تصبر وقت الشده...

حمد بضعف كسر خاطر عمه وهو يصيح: أي رياييل يا عمي..انا خلاص من يوم راحت هالاخت لا عاد تعتبرني عايش انا مت من يوم ماتت..

دمعن عيون بو خليفه وعوره قلبه على ولد اخوه.....

ونش حمد بضعف: بس ماتت بدريه يا عمي..اختي الوحيده ماتت...وين ابدلها وين؟؟؟ من يردها لي...

بو خليفه بحنان: استغفر ربك يا ولدي..وخاف الله في نفسك...الموت حق علينا كلنا..اليوم هي وباجر انا وعقب انت بعد عمر طويل..وين ما سرت لا مفر من الموت...

حمد لوى على عمه وتم يصيح من خاطره...وبو خليفه احترق قلبه على ولد اخوه..ودمعن عيونه..وهو في خاطره يقول..

"لو اخوها انهار  هالكثر ...مسكين حالك يا عبدالله يا ولدي شو بتسوي.؟؟"

................

في البيت اتصل خليفه بعبدالله...وقاله ان حرمته واخوها استوى عليهم حادث..بس ما خبره ان بدريه توفت...وكانت ساره حذاله تصيح من قلبها...

خليفه: يا عبدالله يا خويه الله يهديك..ما فيها الا كل خير..انت رد وتطمن على حرمتك..

عبدالله: يا خليفه هالسوالف ما فيها مزح ارمس لاخر مره..بدريه شي صار عليها..

خليفه: لاء..

عبدالله: احلف يمين الحين ..

خليفه بضيج: يا عبدالله خاف الله فيني عندي دوام ..ما تصدقني اتصل بأبويه...

عبدالله: عيل انا حاطنها بذمتك ليوم الدين..انا راد بوظبي الحين...

خليفه: ان شا ءالله..

وبند عنه ولف يشوف ساره منهاره..وتصيح بحرقه..وكسرت خاطره...ونش ولوى عليها..

خليفه: فديتج يالغاليه عسى ربي لا يحرمني منج...

ساره تصيح: بدريه يا خليفه..(وقبل تكمل صاحت بصوت عالي)..

تم خليفه يهديها ونش بييب لها ماي وهو طالع الصاله شاف البنات يطالعن رادات من المدرسه يضحكن وسلمن عليه...وعوره قلبه يوم شاف عفرا مبتسمه وتضحك...ما يدري لو تعرف شو بيصير فيها....

يوم حست عفرا ولفت تشوف ابوها..لاحظت انه فيه شي...بس ما رمست..

حمده: احس في شي.؟

عفرا: وانا بعد..

حمده: نروح عند امايه احسن هي بتخبرنا...

عفرا: يالله نشينا..

وسارن لامهن بسرعه...ودخلت حمده وعفرا تمت واقفه عند الباب...وساره كانت تصيح...

حمده: امايه فديت روحج شو بلاج؟

عفرا دخلت: امايه ليش تصيحين حد صار عليه شي؟

ساره: عمتكن ..

عفرا بخوف: من عمتنا وشو صار؟

حمده: امايه رمسي ابويه اذا يا بيروغنا من هني وما بنعرف شي...

ساره تصيح: عمتكن بدريه توفت...

حمده : شووووو؟

عفرا شهقت بقوه..ووقفت..

عفرا: امايه لاء..انتي شو تقولين..انا بروح بيت يدي بعرف السالفه..

وطلعت عفرا تركض برا الحوش سايره بيت يدها ودمعه ما نزلت من عيونها لين ما تتأكد..واول ما دخلت شافت سمر تصيح في حضن امها.. ...وذياب يالس في الصاله...ومنزل راسه...ويدتها كانت تصيح بعد...

عفرا بخوف وهي ترتجف: يدوه...رفجه عليج براس ولدج خليفه ترمسين. صدق اللي سمعته...؟

ام خليفه وهي تصيح: شو يا بنتي؟

عفرا ودمعت هالمره ما قدرت: وين عمتي بدريه؟

هني صاحت سمر بصوت عالي وما قدرت تمسك عمرها...وبدون أي تردد ولا انتظار كانت عفرا طايحه على ارضية الصاله غشيانه...

...................