الحلقة السادسة

الدريول الصبح واقف ساعه يتريا سلامه اللي ما خلصت بسرعه وحتى ما نشت من وقت..وحمدان يالس في السياره يترياها..

حمدان: اففف يالله اخرتنا هذي..باشا روح يالله..

باشا: شو روح بعدين بابا راشد عصب..

حمدان: يا خي روح شو هالحاله اول كلاس عندي امتحان ممكن تروح...؟

ويت سلامه تركض بسرعه وبطلت باب السياره..

سلامه: سوري حمدان والله ما عرفت اربط شعري...

حمدان: وانا شو يخصني..يالله باشا روح...

وسار حمدان وسلامه المدرسه...

وفي حجرتها كانت ليلى تلبس بهدوء عشان شيخه ما تنش..وكان خاطرها تبوسها قبل تطلع بس خافت تنش ويتكنسل الدوام كامل...تلبست ونزلت الصاله وشافت امها كالعاده وسلمت عليها...ويلست تتريا حصه عشان تمرها...

ام راشد: فديتها والله هالبنيه..ما تقصر كل يوم تييج..

ليلى: زين امايه عادي احسن اروح وياها بدل ما اسير ويا الدريول لروحي..وبعدين هي اقرب خلها تمرني...

وشوي ويرن تلفون ليلى..

ليلى: هلا والله صباح الخير غناتي..

حصه بفرح: صباح الورد والجوري شخبارها حبيبتي اليوم..؟

ليلى: بخير دامي اسمع حسج...

ابتسمت ام راشد وحست بداخلها براحه ان بنتها تقدر تستانس مع حصه وتمنت لها الخير ودعت لهن بالتوفيق والنصيب على هالصبح...

حصه: يالله اظهري انا عند الباب وهاتي شيخه وياج بحبها...

ليلى: الله يخليج لا تضحكيني شو تبين في شيخه الحين..هذي بس لو تشوفني لابسه بيجاما سوداء تعلقت فيني وقالت وين بنلوح..؟ تبينها تشوفني لابسه عباتي بتتخبل....

تضحك حصه: يالله طلعي وسلمي لي على امج لو هي ناشه...

بندت ليلى وسلمت على امها وطلعت اول ما ركبت السياره باست حصه ويلست عدالها...

ليلى: فديت هالويه يا ربي والله ولهت عليج..

حصه تمثل انها مستحيه: وااااي شو هالرمسه من الصبح؟؟  لحظه بفتح الباب وبعق عمري في الشارع العام باي ...

ليلى تضحك: الله يغربلج يا حصووه...

حصه: والله!!!  شو تسمعيني رمسه حلوه من الصبح ما روم انا خلاص كل الخلايا عندي تنصهر...

ليلى: زين خلاص بسمعج كلام يسم البدن....

وتمن يسولفن لين ما وصلن الدوام...وسارن مكتبهن....

.
.
في مكتبه كان ناصر يالس يعدل الاوراق ويختم بعضهن ويفكر في مشروع مع شركه قدمت له عرض وتسهيلات ويفكر يشترك وياهم..بس بعده متردد شو يسوي..كان غصبا عنه مبتسم..ابتسامته فيها حنان ورقه وفيها ابوه دافئه..ناصر رغم كل ظروفه وحياته وصعوبتها بس يتم انسان راقي بمعنى الكلمه وحنون وقلبه كبير..اليوم يحس بشي غريب وبفرحه عجيبه ويتمنى يتم له هالشعور على خير...يرتب الاوراق وغصبا عنه تمر صورة ليلى جدامه...

ما يقدر يمنع نفسه انه يبتسم..وكم حاول وحاول انه يقتل هالحلم ويعيش الواقع وما يتخيل وايد...

بس من يقدر يسيطر على مشاعره..هذي اكبر حرب وهي حرب المشاعر...يفكر فيها ويبتسم من خاطره وشوي وما يعرف ليش خطرت على باله صورتها وهي صغيره...يوم كان هو واخوانها في بيتهم يتسابقون وكان خاله المرحوم بو راشد يعد لهم من واحد لين عشره...

وينطلقون وكانت ليلى دبه وهي صغيره ويتذكر شكلها يوم كانت دوم اخر وحده توصل ويردون هم  اللفه الثانيه وهي بعدها ما وصلت اول دوره...وكان في اخر دوره يعدها لهم بو راشد تعب وقال حق بو ناصر يكملها..وعد لهم ابوه..وركضوا كلهم ووقفت ليلى معصبه ان محد ترياها وانها ولا مره طلعت الاولى وهي في نص الدرب ما كملت السباق الاول شافتهم رادين وردت قبل تكمل وعصبوا الاولاد اللي وياها وهم اخوانها راشد ومبارك وهو واخوه فهد..وبسرعه ركض لها فهد اخوه ودزها على الارض وطاحت وتمت تصيح وياها ناصر وشلها ومشى بها خمس خطوات بس هو طاح من متنها وما قدر يكمل وطاح فوقها ما رام لها...وزاد صياحها ونش ابوها وشلها من تحت ناصر وهو ميت ضحك على شكله...

كان ناصر يسبح في افكاره ومبتسم...وقطع عليه افكاره تلفون المكتب...

حمد: السلام عليك استاذ ناصر..

ناصر: هلا والله بحمد شحالك..

حمد: بخير وسهاله..اقول ناصر..

ناصر: تفضل...

حمد: انا طرشت اخر مجموعه وصلتني لشركة ظبي الخليج..وقالوا اليوم المغرب بيردون علينا...

ناصر: بارك الله فيك يا حمد والله بدونك مادري شو كنت بسوي...

حمد: الخير فيك وان شاء الله نسوي اللي نقدر عليه...زين اقولك بتم لهم ولا انا ايلس هني...؟

ناصر يضحك: اللي تشوفه يا حمد بتيلس للمغرب؟

حمد: ما عندي مانع والله شغلي جريب من الشقه يعني ماشي مشكله...

ناصر: عيل برايك خويه وان شاء الله تتصل فيني عقب ما تخلص وخبرني كل شي..

حمد: فالك طيب..

ناصر: فالك ما يخيب...

وبند عنه حمد..ويلس ناصر يكمل شغله ويخلص اللي باقي من اوراق الشركه...

.
.
.

مر حمد مكتب ليلى وحصه...وطالع ليلى وابتسم وهي طالعته بنظره حاده خلته يغير ابتسامته لنظرة تحدي ثانيه...

حمد: كيفكن صبايا....

حصه مبتسمه: بخير وانت شحالك...؟

حمد ببرود: مثل ما تشوفين عال العال...

ليلى وهي تتعبث في اوراقها...طالعت ويه حصه وهي من الصبح موصتنها تكون بارده وعاديه عشان تقهره اكثر....بس حصه وين تقاوم اللي في قلبها وتمت مبتسمه وكل شي مبين من لهفتها وعيونها وعاد حمد ما صدق وليلى تخزها بنظره تباها تصطلب شوي بس ما طاعت..وظهر عنهن حمد...

ليلى بعصبيه: سخيفه وبتمين سخيفه..انا شو قلت لج تسوين...البسيه احسن شي...

حصه: جب جب..

ليلى: هاللي قدرتي عليه...؟

حصه: شو تبيني اسوي ما اقدر..يعني اقص على عمري والله انتي ما تحسين فيني...

ليلى: شوفي كيف يعاملج وكيف يرمسج شو من ادميه انتي...؟؟

حصه: لحوول احنا كل يوم بنتم على هالحال..الله يخليج لا تتدخلين في حياتي...

انصدمت ليلى بس سكتت عنها ويلست تكمل اللي في ايدها وحصه طلعت عنها....ونزلت الدور الثالث...وسارت عند وحده من الموظفات اليداد في الشركه اسمها مشاعل كويتيه وعمرها 23 سنه اصغر عن حصه وليلى بثلاث سنين..بس طيبه وحبوبه وسوالفها عسل..ومحد متضيج منها وعمرها ما اشتكت من حد ولا حد اشتكى عليها...ملامحها طفوليه وابتسامتها بريئه وفيها جمال خليجي وسمارتها محليتنها اكثر...وكل شي في قلبها على لسانها....يايه مع اخوها عمره 21 سنه من الكويت عنده شركات ولها فرع في الامارات وياي يشرف عليه ويديره بنفسه..هي اكبر عنه بس ما اشتغلت معاه وحبت تكون لها حرية المكان اللي تبغيه واشتغلت في هالشركه...

حصه دقت الباب ودخلت...ونشت مشاعل من مكانها على طول وسلمت على حصه...

مشاعل مبتسمه: يا هلا والله اش هاليوم بيكون وانتي يايه تزوريني على الصبح...الله الله شو هالحلى كله...

حصه مبتسمه: الله يخليج أي حلاة...نحن مخلين الجمال كله لبنات الكويت ما يخصنا فيه...

احمرت خدود مشاعل: فديت روحج حبيبتي ...

وضحكت هي وحصه...

مشاعل: شوفيني اتعلمت حجي اماراتي وقمت اتفداج...

حصه: غناتي والله...

مشاعل: الا اقول ما شفت ليلى اليوم وينها...؟

حصه وتغير شكلها: مادري...في المكتب ولا مدري وين..؟

مشاعل مستغربه: لا عاد ما يصير جذي...الثنائي المرح زعلانين على بعض ليش..؟

حصه: اشدراني فيها بعدين مب زعلانات..وليش نزعل ماشي يرزا..

مشاعل: شو؟

حصه: اقصد ماشي يستاهل ماشي يستحق..لا يوجد داعيٍ لذلك...

ضحكت مشاعل: لا عاد شكلج معصبه على الاخر...

حصه: زين شو مسويه وشو اخبارج واخبار اهلج...؟

مشاعل: والله كل شي زين..البارحه امي اتصلت فيني وكلمت ابويه ويدتي وبنات عمي...

حصه: ان شاء الله انهم بخير...وشخبار الكويت؟..

مشاعل مبتسمه: الحمدلله ماكو شي يديد..وانتي تعرفين الحرب في العراق توها مخلصه فيعني شوي توتر في المكان...بس الحمدلله على كل حال ابوي قال كل شي زين و امي تقول انها متولهه علي...

حصه: هيه والله يا حليلها اكيد بعد بنتها الوحيده لازم...واخوج اللي هني شو اخباره..؟

مشاعل: الحمدلله زين بس تعرفين شغله وايد متعب ما يردلي الا اخر الليل وانا اخاف اتم بروحي في البيت ...بس هو قال لي بييب لي خدامه تيلس وياي..مع ان الشقه ما تحتاج شغل وايد...

حصه: الله يعينج...

تمن يسولفن... ونست حصه ليلى...اللي تمت تشتغل في مكتبها وهي متضيجه من اسلوب حصه اليوم وياها..بس حاولت تطلع لها مبررات وقالت بخاطرها ان اكيد لحظة غضب...وعقب كل شي بيرد مثل ما هو...تمت تكتب تقرير للمدير العام للشركه وقبل تخلصه دق الباب..وعدلت شيلتها وتحجبت...وكان الهندي اللي ييب الشاي الصبح..وحط لها كوبها وسألها عن حصه بس قالت له انها ما تدري وينها ويلست تخلص شغلها وبدون ادنى شك ان ناصر كان في بالها ولو انها حاولت تبعده شوي عشان تشتغل عدل.....

وعند باب المكتب...بكل هدوء ...

ناصر بهمس وهو يوايج من حذال الباب: صباح الورد ابله ليلى...

قلبها دق بسرعه وحست بالدم يمشي في عروقها اسرع ..حست برجفه بس ما شافت من اللي يرمس..لكنها عرفت الصوت...تغلغل في مساماتها وفي كل خليه في جسمها..في عيونها وقلبها وكل نبضه فيها..حست لبرهه انها تطير وانها مب هي ..حست بالعالم يتلون من حواليها..والحياة لها طعم ثاني...ورفعت راسها مبتسمه وعدلت شيلتها ودخلت شوي من شعرها اللي كان طايح على ويهها وهي تكتب...

ليلى وتيمع الدم كله في ويهها ومبتسمه من خاطرها: صباح النور...

ناصر مبتسم وهو يشوف ويهها احمر مثل الورد : كل هاه استوى عشان قلنا صباح الخير...؟؟

ليلى بعدها مبتسمه: تفضل استاذ...

ناصر وهو واقف عند الباب: ياخي ذليتينا بالاستاذ هذي كم مره اقولج لا تقولين استاذ..

ليلى: ليش معصب..؟

ناصر: كيفي مواطن...

ليلى: يعني انا من وين ..؟حد قالك اني من شرق اسيا ولا من ساحل العاج...؟

ناصر يضحك: يا سلام يا ام لسان من متى ما تهاوشنا...تحريت لسانج انقص يوم كبرتي اثاريه  كل يوم يطول...

ليلى: من يومي...اونك ما تعرفني...؟؟

ناصر : اليوم يالس اتذكرج يوم نتسابق وشليتج و......

ليلى تضحك: بس بس الله يخليك اسكت..ذليتنا عاد...

ناصر يتنهد وبعد مبتسم: كسرتي لي عظامي ذاك اليوم جني شايل دبة غاز على ظهري...

ليلى وهي مبتسمه:بس عاد والله مصختها....

ناصر:يا سلام على ايام قبل ما تتعوض...

ليلى وهي تطالع الاوراق: ليش ياي ..؟

ناصر: كيفي بعد شو اسوي ..؟ نص الشركه ملكي..وانا حر...

ليلى: يعني انا ما شي ملكي..يا بابا انا لي ربع النص...؟؟

ناصر مبتسم بمغايض: اوكي قلتيها ربع في النص...لكن انا لي النص...

ليلى: زين وشو يعني ما وصلنا لهالحال المتردي اللي نحن فيه الا الفلوس..

ناصر: زين يا ويهج ملسونه محد يروم لج والله...بسير مكتبي...باي ..

ليلى: تعال ما قلت لي ليش نازل شو عندك تحت...

ناصر وهو معطنها ظهره بيطلع: لا والله بس ييت اسلم عليج..حرام ولا شو..؟

وسار عنها دون ما يشوفها بس هي ابتسمت من القلب وحست عمرها فراشه وبتطير من الوناسه..وقلبها يدق بسرعه بسرعه...

تنهدت وبينها وبين نفسها

"فديت روحك"

.....................

في المدرسه كانت عفرا في الكلاس تتريا متى يي الاستاذ وكانت ساكته وبعده الكلاس ما انمزر طلاب..وتدري شو بيستوي عقب شوي يوم ان كل اللي في الكلاس بيتيمعون عليها كالعاده يبونها تغششهم..بس هي ساكته ما رمست ويت حذالها وحده من البنات...

عفرا وهي ماسكه الكتاب وتحل كم مسأله وتتدرب عليهن قبل يوصل الاستاذ اللي أجل الامتحان للحصه الثالثه..والطلاب في الصف كانوا كلهم يلعبون ويضحكون وهي الوحيده اللي قابضه كتابها....

ريهام: عفاري ما تعبتي... ؟

عفرا تنزل نظارتها: من شو؟

ريهام: من الدراسه خلصتي الكتاب فوق 30 مره...

عفرا وهي تبند الكتاب: اوكي ما بدرس ..ارتحتي...بس شو تبيني اسوي...؟

ريهام: تعالي نسولف...

عفرا وهي تفتح كتابها مره ثانيه: لاحقه على السوالف...

ونشت ريهام وسارت تيلس عند باقي بنات الكلاس...

فاخره تهمس لريهام: شو قالت لج..؟

ريهام:محد ياخذ منها حق ولا باطل حشى ترمس من طرف خشمها الله يخس العدو فشلتني..والله حسيت عمري اطر منها...

فاخره: عادي من يومها جي شو نسوي بها..

ريهام: بس انا ما درست كنت طول الوقت في راس الخيمه...

فاخره: الله يعين انا ما قدرت افهم شي وقلت لامي توديني عند مدرس بس ما طاعت وقالت خلي المدرس لنهاية السنه...

وشوي ويووهم الشباب...

طارق: شو بنات درستن ولا لاء؟

ريهام: ما سوينا شي بغينا الاخت تغششنا وما سوت لنا سالفه...

طارق: خلها تولي ..مذله هالبنت...

فيصل: برايها بس وين منال ؟

طارق: هيه والله هذي البنت السنعه اللي تغشش عدل...

ولفوا يدورونها وشافوها في اول الكلاس يالسه ويا حمدان وهدى و عذاري و سلطان...وكلهم متيمعين عليها وهي تدرسهم من الخاطر...

ودخل الاستاذ وعلى طول دخلت عفرا كتابها في الشنطه ويلست تقرا بعض الايات والطلاب ارتبشوا ويلسوا كلهم حوالينها وحوالين منال ...بس الاستاذ كان اذكى منهم وحطهم بالاماكن على كيفه...ويلسوا يمتحنون وطبعا غشوا نصهم والنص الباقي يحلون ويكتبون اللي درسوه...
.
.
في كلاس سلامه كانت المدرسه غايبه والبنات جالبين الكلاس فوق تحت سوالف ودق وغنى..وبعضهن يدرس والباقي يلعبون..

غيداء: سلامي وين سرتي في الويكند..

طالعتها سلامه باحتقار: وانتي شلج..؟

عصبت غيداء...ونشت عنهن..

منيره: عيب شو هالاسلوب يا سلامه سألتج سؤال عادي..

سلامه: كيفي مب عايبنها تطلع من الشله..

منيره وهي ما تبى تفرض رايها على سلامه اللي متزعمه الشله: اوكي...

ونشت سلامه وطلعت من الكلاس وسارت بعيد في مكان محد ييلس فيه الا هي.ويلست تتريا متى يخلص الوقت ويستوي اللي في بالها...

...................

الساعه 11:00 الضحى كانت ام خليفه يالسه في الصاله مع بدريه...اللي ما ردت دبي...

ام خليفه: متى بتردون بيتكم يا بنتي...

بدريه: ما نبى نرد..بنتم هني..

ابتسمت ام خليفه من خاطرها وفرحت...وما صدقت بعد..

ام خليفه: علني افدا هالويه يا بنتي..وين ريلج اليوم..؟

بدريه: بسير اوعيه الحين طول رقاده...

ونشت بدريه وسارت حجرتهم فوق...اول ما بطلت الباب لقته راقد...وقربت منه وشغلت الليتات..

بدريه وهي تفتح الستاره: يالله عبادي الساعه 11 لو انك في دبي بشوفك من الساعه 6 وانت ناش..

بس عبدالله ما تكلم...ولا تحرك مول..وقربت منه وحطت ايدها على كتفه وهزته بحنان..

بدريه: عبادي يالله مب ناوي تنش ولا شو سالفتك...

بعد عبدالله ما تحرك ...

بدريه: حشى مب رقاد اوادم هذا...سبات دببه..يالله عبادي شو هالحركات نش امك تتريانا في الصاله...

وسارت له من الجهه الثانيه وشافت ويهه..

بدريه: لحوول عبدالله نش عاد والله رفعت لي الضغط شو من حركات هذي...

ويلست على الشبريه وتربعت: انا زعلت لا ترمسني عنبو ساعه ارمسك ما ترد علي يالله نش..

وسحبت عنه اللحاف وشغلت المكيف والجو كان بارد....بس بعد عبدالله ما تحرك..وتمت تهزه وتوعيه بدون فايده...

بدريه وبدت تعصب: والله انك سخيف يالله نش...عيب عليك والله...

واخر شي نشت من عنده وسارت من وراه ويلست حذاله ويودت كتفه وهزته شوي..بس عبدالله ما تحرك ولا نص حركه...

وبدريه الحين صدق خافت وقلبها دق بسرعه...وحست بشي غريب...قلبها كان يتنافض وما تدري شو الاحساس المفاجئ اللي ياها...

وبصوت كله خوف : عبدالله الله يخليك بس نش ثواني اعرف ان مافيك شي وعقب رد ارقد...

وحطت ايدها على يبهته تتحسس اذا محموم ولا لاء...بس كان عادي وحتى شوي كان جسمه بارد...

زاغت بدريه وحست بالموت في عظامها وتمت تحركه..واخر شي بتلقائيه دمعت عيونها..

وبصوت كله تعب ومختلط عبرات ومتحشرج: عبدالله ارجوك نش...

عبدالله يوم سمع حسها هالشكل بطل عيونه وانفجر ضحك....وتم يطالعها وهي تمسح دموعها...

عبدالله: ابيييه والله ما توقعت تصيحين حرام حبيبتي....والله كنت امزح معاج...

بدريه مبطله عيونها وفرته بالمخده: صج انك ما تستحي ولا تخيل ..مسود الويه..

ونشت عنه بس قبض ايدها...

عبدالله يضحك مب رايم ييود عمره: والله دشيتي وكنت بنش ....بس يوم شفتج مستانسه قلت بزيغها شوي...كنت بكمل لين ما تموتين من الزياغ بس صراحه ما روم لدموعج...

بدريه محرجه: صدج انك سخيف كل هذا عشان تطفر بي..اصلا انا ما زغت هذي حركه عشان اخليك تنش..

عبدالله ما رام يسكت ويضحك من قلبه وهي محرجه على الاخر:هيه صح مبينه انها حركه..حتى الدموع شكلها مصطنع...

بدريه وهي تطالعه بنظره حاده: دمك ماشي اثجل عنه..بس ما عليه يا بو حميد مردوده..

ونشت وهي معصبه...

عبدالله وهو ينش من على الشبريه ويضحك: انتي محد يمزح معاج..؟

بدريه وهي ترتب اللحاف وتبطل الليتات: مزحك بايخ...

ونش عبدالله الحمام وسار عنها وهي طلعت وسارت تييب له الريوق ..

.............

الساعه 12:30 نشت شيخه ويلست على الشبريه تطالع يمين ويسار..ونزلت علىطول وبطلت باب الحجره وسارت عند الدري ووقفت كالعاده تتريا حد يي يشلها لانها  تخاف تنزل من فوق...

تعبت من كثر ما تتريا واخر شي يلست على اول درجه تتريا حد يي يشلها...

كانت ام راشد في الصاله بس ما سمعت حسها.. يوم ملت من كثر ما تتريا..

شيخه تزاعج: ماما...

سمعتها ام راشد ونشت ووقفت لها تحت وتطالعها وهي متقبضه في حدايد الدري...

شيخه: تألي ثليني...

ام راشد وهي تطالع فوق: وين اطلعلج..انا ما روم امشي خطوه تحت تبيني اطلع لج فوق...يالله خلي البزا وانزلي...

شيخه بعصبيه: ماليد تالي اتي..

ام راشد: يا بنتي سمعي الرمسه وانزلي..

شيخه: احاف احاف ماليد تالي..

ام راشد: لحوول شو من بنيه انتي..؟

شيخه وقربت تصيح: اليد امي وين امي...

ام راشد وهي متضيجه: امج الله يرحمها من وين اييبها لج...انزلي يالله...

شيخه: اتي طفثه طفثه...

ام راشد وهي مبتسمه: زين انا طفسه بس انتي انزلي...

شيخه معصبه: لوحي ماليدث ماليدث..وين امي...

ام راشد وهي سايره عنها: برايج تمي فوق لين ما تييج عمتج..

وراحت ام راشد وما تمت وياها...وسارت الحوي تزقر البشكاره اللي يتها على طول...وطلعت تييب شيخه وغيرت لها وحطت لها اكل ويلست تلاعبها..

..................

الظهر كانت حصه تشتغل وما رمست ليلى مول...وليلى بعد ما تكلمت خلاص تعودن على هالاسلوب..وكل يوم او تقريبا بين وقت واخر لازم يستوي بينهن خلاف بسبة هالموضوع....صارت الساعه 1:30 ودقت ليلى على البيت عشان ترمس شيخه...

ليلى: السلام عليكم..

شرملى: وعليكم سلام..

ليلى: شرملى شواخي نشت...؟

شرملى: ايوه..صبر ماما دقيقه هي يجي...

وسارت ويابتها للتلفون...

شيخه: الووه...

ليلى: هلا حياتي..

شيخه اول ماسمعت صوت ليلى: ماما تأاالي..

ليلى: زين حياتي بعد شوي بيي..

شيخه: انا بلوح يالله تألي...

ليلى: خلاص زين حياتي ...كلي عدل..وانا بييب لج حلاوة...

شيخه:ذين..

وصكرت عنها...

وطالعت حصه ولقتها يالسه تسوي typing لتقرير بتسلمه الساعه 2:00....

ليلى: ما بترمسين..؟

حصه رفعت راسها: يوعانه شو رايج نسير نتغدا...

ليلى: وين..؟

حصه: في بيتكم..

ليلى مبتسمه: والله..؟

حصه: هيه..

ليلى: لا تقصين علي ارجوج...

حصه مبتسمه: عادي بتغدا عندكم بس بيكون الوداع الاخير وعقبها بيقطعوني اخواني...وبيحطوني في اكياس وبيوزعوني في غابات منغوليا ..للذياب اليواعى...

ليلى: اوكي مب مشكله اهم شي تقضين اخر يوم عندنا...

حصه: طفثه...على قولة بنتج شواخي...

ليلى: ارمسها توني تقول..اذا ما ييتي انا بروح..مادري بها وين بتروح...والله البارحه في الليل ما خلتني ارقد تتنطط ومحتشره وفرحانه بالظلمه...

حصه: شفت ناصر مر عليج الصبح وانا راده المكتب بعدين قلت ما بخرب عليكم ورديت عند مشاعل...

ليلى مبتسمه: وخير وشو يعني..وشو مثلا بيقول لي...؟ حصووه خلي الخبال عنج..اصلا ناصر ما يداني هالسوالف..بنت خاله لازم يي يسلم عليها..

حصه: هيه صح..على فكره مشاعل الكويتيه تسلم عليج...

ليلى: فديتها والله..قبل يخلص الدوام بمر عليها...

حصه: لا خلاص راحت اخوها يالها وخذها ..قالت بتسير البيت عندها وحده رفيجتها على قولتهم بتيي تزورها وتبى تجهز الشقه...

ليلى: يا حليلها والله...

حصه: باقي 10 دقايق ويخلص الدوام يالله متى بتودين التقرير..

ليلى: الحين ..انتي خلصتي..؟

حصه: باقي شوي سيري سلمي وانا بيي...

وطلعت ليلى بتسير الاداره القسم الخاص عشان تسلم اخر تقرير في مجال مبيعات الشركه لهالموسم...وفي الوقت اللي طلعت فيه ليلى من المكتب ..حمد سار عند حصه..ودق على باب المكتب...

حصه: تفضل..

ودخل حمد يوم رفعت راسها وشافته ابتسمت...

حمد طالعها بنظره..

حصه: شو فيك..خير..؟

حمد: سمعي الحمدلله يوم ان ليلى مب موجوده هني...ابى اقولج كلمتين واطلع...

حصه قلبها دق بقو..خوف على ربكه على احساس كبير بالرعب...

حصه: امر شو..؟

حمد: شو اللي يوديج مكتب مشاعل الكويتيه..شو تبين فيها...انتي يايه تشتغلين ولا تسيرين على الموظفات...

حصه مبطله عيونها: وانت شعليك..؟

حمد بضيج: شو..؟

حصه تراجعت في رمستها: اقصد شو اللي مضيج بك..ليش تعرف شي ولا سامع شي عنها..؟ شو بلاها البنيه طيبه ومزيونه..

حمد يقاطعها ويرمسها باحتقار: اقول سكتي سكتي وطبي لسانج بثمج..ما يخصج فيها ولا تسيرين مكتبها..وجان رمستيه هب عايبتنج اقولج ان شفتج في مكتبها ولا تسولفين وياها اعتبريها مفصوله من الحين..وانتي وضميرج لو ترضين تفصلين أي بنت من شغلها...

حصه نشت من مكانها وطالعت حمد بغرابه: انت شو تقول...شو وراك يا حمد..؟ وعلى شو ناوي..انت ليش مستوي جي..؟ والله انت ما كنت هالشكل..شو اللي غيرك..تعوذ بالله من ابليس ومحد يبى منك شي...بس رد حمد ذاك الادمي الاولي...علىالاقل حسن من صورتك  جدام الله وخلقه...

حمد وهو بعده محرج: ما ييت اخذ عندج درس في الادب..حصووه شوفي شغلج واسكتي ...جانج تبين البنيه تتم في شغلها...

وطلع من عندها..وهي يلست على الكرسي وحست بمشاعر غريبه في داخلها وتناقض فضيع...

" حمد شو يبى من مشاعل..اعرفها البنت محترمه ما عندها لف ودوران...بس ليش ما يباني اسير لها...شو سالفته هذا انا اريد افهم..؟"

ومسكت راسها وحست بصداع فضيع..وحست بالدنيا تدور بها...هي تعرف ان حمد راعي بنات وسوالف بطاليه..تعرف انه يرمس وحده اليوم وباجر يرميها ورا ظهره...

تعرف كل شي عن حمد...بس مع هذا تحبه..تحب جبروته وغروره..دوم تعودت على السلطه والقياده...بس تبى تجرب يوم من الايام حد يمارس جبروته عليها...تستلذ بتعذيب حمد لها...في قلبها حب كبير ولكن في نظر الناس...لشخص اخطأت في اختياره ... " لا لا هذا شو يبى في مشاعل...لا حووول لازم نتنكد على اخر اليوم...حسبي الله على ابليس..."

ودخلت ليلى..وحصه سوت عمرها طبيعيه قد ما تقدر...وابتسمت...بس وين على من..؟ لو قصت على كل العالم كل حد تقدر تخبي مشاعرها عنه الا ليلى...

ليلى قربت منها: شو فيج حصوه..؟

حصه: ماشي يالله نروح الساعه 2:05 تأخرنا...

ليلى وهي تطالعها بغرابه: زين يالله نسير..بس سلمتي التقرير...؟

حصه: بزواله..مب الحين باجر الصبح...

ليلى: على راحتج...

وهن يجمعن اغراضهن....مر ناصر من عند المكتب وطل براسه وشافهن بس ما شافنه وروح على طول..وفي خاطره..وهو مبتسم.." اهم شي اني اشوفها قبل اطلع.."

طلع ناصر ويلس في موتره...وشاف ليلى وحصه طالعات وركبن ويا الدريول...ويوم شافها روحت على طول سار البيت...وفي الدرب..

وكان حاط الاف ام

"محطات الظهيره"

مبتسم مايدري ليش..هالمزاج الحلو من الصبح..واللي زاده ان رمس ليلى اليوم...يحس في شي مختلف..بس بعد هو يخاف من شعوره بالفرح لانه يخاف من الصدمات عقب..
"لحوول شو فيني مستوي مراهق اليوم...والله حاله.."

وطالع ويهه بالجامه...وكان مبتسم..ويلس يرمس روحه...

" انت الله يستر منك..ليش فرحان انا ابى افهم..شو اللي مفرحنك هالكثر.."

ووصل البيت ودخل السياره ونزل عند اهله..

................

الساعه 2:45 كانت ليلى تبدل ثيابها...بس بعدها للحين ما شافت حد منهم..ولا حتى شيخه...بس كانت تفكر في ناصر ..ما قدرت تتخيل شكثر استانست اليوم على اللي صار رغم انها تكابر دايما ولا تبين شوقها..وسارت عدال المنظره وابتسمت بفرح..

" الله يا ربييه والله اني متقطعه من الوناسه..فديت روحي...بتخبل والله.."

لفت شعرها بسرعه..وطاحت خصله على يبهتها....ورفعتها ..اول ما شافت ويهها في المنظره...كانت تحس انها مشرقه وفي عيونها لمعة حب وامل وشوق...خدودها كانن حمر...

تنهدت...وابتسمت مره ثانيه وثالثه..وحست عمرها اليوم مختلفه....

" يا ربي كم تسوى عندي نزلته من فوق عشاني..."

وعند الباب...

شيخه: ماما افتحي الباب...

انصدمت ليلى انها اليوم ما فكرت مول عقب ما ردت انها تشوف شيخه....وركضت للباب وبطلته...وشلتها ولوت عليها...وشيخه مستانسه..

شيخه: ماما حبيتي...

ليلى وهي تبوسها: حبيبتي والله فديت حياتج...

وسارت وطاحت ليلى على الشبريه ويلست شيخه  فوقها....

ليلى وويهها احمر: فديت روحج هذا وانا بس افكر فيه نسيتج...لحوول ما بسامح عمري ابداً..

شيخه حطت راسها في حضن ليلى...

شيخه: ماما حبيتي اتي..

ليلى: وانتي حبيبتي بعد...شواخي تغديتي..؟

شيخه: لا لا ماليد...

ليلى وهي تنش: تعالي بنروح عند يدووه وبنييب الغدا...

شيخه تمد ايديها عشان تشلها ليلى...ونشت وياها ونزلن تحت..

...........

ردت حصه البيت وكانت بعدها تحت تأثير رمسة حمد...سلمت على اهلها وطلعت فوق...ومرت على حجرة بدريه..بس لقتها مبنده...اول ما دشت الحجره شافت سمر..

حصه وهي تتنهد: يارب..

وونزلت عباتها ووقايتها...

حصه: ممكن تطلعين لين ما ابدل ثيابي...؟

سمر: اوكي..

وطلعت سمر وحصه بدلت...وبطلت لها الباب ودشت...وبندت حصه الليت بترقد..

وانسدحت سمر بعد تبى ترقد...

حصه وهي لافه ويهها صوب اليدار: سمر...

سمر: هاه..

حصه: قوم عبدالله خويه ساروا.؟

سمر: لا بعدهم...بس الحين يرقدون في حجرة سلامي ختيه...

حصه: ما سمعتي متى بيردون..؟

سمر: اليوم على الغدا عبدالله اخويه قال انه يبى ييلس في بوظبي لين ما بدريه تطلب انها ترد دبي...

صخت حصه....وشكلها رقدت...

سمر: حصوه رقدتي...؟

يوم ما ردت حصه...سمر على طول تلحفت ورقدت..

...........

في الصاله الكبيره اللي مجابله الحوش...كانت البشكاره تحط الغدا على السفره..ويلست ام ناصر وابو ناصر..وناصر واخوه فهد...

ابو ناصر:شو هالغدا الزين يا ام ناصر...

فهد: ما يحتاي امايه ماتقصر طباخها لا يعلو عليه...

ام ناصر: هني وعافيه...

ويلسوا يتغدون وناصر ساكت ما رمس...بس محد انتبه..لان هذي حالة ناصر من يوم المشاكل ويا ابو ليلى...صح ياخذ ويعطي ويا اهله..بس بعد قلبه على ليلى..ويدري انه مهما صار مستحيل يتخلى عن حبه لها..ولو ان كل الظروف ضده..ولو انه يلاقي صعوبه كبيره انه يقنع نفسه ان ليلى ابعد عليه من الشمس..وانها مجرد خيال في خيال..لكنها حب باقي... عمر الايام ما تمحيه...يعرف ان زواجه من ليلى مثل اللي يمد ايده يبى يطول نجمه ويودها بإيديه...

فهد: اخوي ناصر بلاك ما ترمس...شي يعورك..؟

ناصر مبتسم: لا بخير الحمدلله..ما تشوفني اكل..عمرك سمعت عن مريض شهيته مفتوحه..؟

بو ناصر يبا يغير الموضوع: فهد شو مسوي في الدوام..؟

فهد: ما شي الحال..بس بعدني ما تعودت على خلق الله اللي هناك...

ناصر: شو رايك تيي عندنا الشركه..يعيبك هالنوع من الشغل...

بو ناصر بضيج: لا يا ناصر يكفي انت..ما نبى شي من بيت خالك واهله..مادري شو اللي بالشنك بالشغل وياهم..؟

ناصر: يا بويه الله يهداك ما دريت بك الحين..انت متضيج عشان حق امي..والحين تقول لي ليش اشتغل وياهم..؟ بعد شغلي ولازم اعطيه حقه...

فهد: كنت تقدر تشتغل في أي مكان مب لازم وياهم...

بو ناصر: هذا اللي قدروا عليه..عطوك مكتب في شركتهم وقصوا عليك..

ناصر: ابويه محد قص علي الحمدلله انا ريال ما ينقص علي..وهذا اللي قالوا انه حلال امي..هذا انا اشتغل فيه...

فهد: وايد عليهم..وباقي الحلال لهفوه ما يستحون..ابى افهم كيف قادرين ياكلون ويرقدون وعايشين حياتهم وكل ملبسهم ومشربهم ومرقدهم حرام...

ام ناصر كانت ساكته ما رمست ولا قالت شي..ومب جنه الي يرمسون عنه المرحوم اخوها وعياله...

ام ناصر تمت صاخه ما تدري شو تقول..صعب عليها تعارض عونها وسندها..وفي نفسها..

"الله يرحمك يا خويه...ويغفر ذنبك..ما ودي كل هذا يصير وانت عايش..عاد وانت ميت...ربي يرحمك برحمته..."

بو ناصر: هاه ام ناصر اشوفج ساكته مب جنه الموضوع يخصج..؟

ام ناصر: بزواله المال اللي يفرق بين الله وخلقه...

بو ناصر مبتسم بسخريه: بعد شو يا ام ناصر..الحين كل هاللي يصير وانتي بعدج تقولين مسامحين..انا ما ابى شي لي..كله لعيالج ولج انتي...

فهد: الله يغربلك يا راشد يا ولد خالي...حسبي عليك الله وعلى كل اهلك...

ام ناصر وهي ضايجه ونشت من على الغدا: لا تدعي على هلك يا فهد وقل ربي يسامحه...حسبي الله على ابليسكم..وانت يا بو ناصر لا تعلم عيالك ولا تزرع في قلوبهم كراهية عيال خوالهم....

بو ناصر مبتسم بخبث: شو اللي ينحب فيهم اصلا..آكل مال الحرام من اللي بيحبه...

وسارت عنهم ام ناصر..وناصر على طول نش ولا رمس بالموضوع..وسار حجرته وقفل الباب ورقد.
...............